പത്താം വളവുമായി എം പദ്മകുമാർ, സുരാജ് വെഞ്ഞാറമൂടും ഇന്ദ്രജിത്തും പ്രധാന വേഷത്തിൽ; മോഷൻ പോസ്റ്റർ

എം പദ്മകുമാർ സംവിധാനം ചെയ്യുന്ന പുതിയ ചിത്രം പ്രഖ്യാപിച്ചു.  മോഷൻ പോസ്റ്റർ പുറത്തുവിട്ടായിരുന്നു പ്രഖ്യാപനം. സുരാജ് വെഞ്ഞാറമൂടും ഇന്ദ്രജിത്തും പ്രധാന വേഷത്തിലെത്തുന്ന ചിത്രത്തിന് 'പത്താം വളവ്' എന്നാണ് പേരു നൽകിയിരിക്കുന്നത്. മമ്മൂട്ടി, വിജയ് സേതുപതി, പൃഥ്വിരാജ് അടക്കമുള്ള താരങ്ങളാണ് മോഷന്‍ പോസ്റ്റർ പങ്കുവെച്ചത്. 

അഭിലാഷ് പിള്ളയാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. യുജിഎമ്മിന്‍റെ ബാനറില്‍ ഡോക്ടർ സക്കറിയ തോമസ്, ഗിജൊ കാവനാല്‍, ശ്രീജിത്ത് രാമചന്ദ്രന്‍, പ്രിന്‍സ് പോള്‍ എന്നിവരാണ് നിര്‍മ്മാണം. രതീഷ് റാം ഛായാ​ഗ്രഹണവും രഞ്ജിന്‍ രാജ് സം​ഗീതവും നിർവഹിച്ചിരിക്കുന്നു. ഷമീര്‍ മുഹമ്മദാണ് എഡിറ്റിങ്. കലാസംവിധാനം രാജീവ് കോവിലകം. ചമയം ജിതേഷ് പൊയ്യ. വസ്ത്രാലങ്കാരം അയേഷ ഷഫീര്‍. 

മമ്മൂട്ടിയെ നായകനാക്കിക്കൊണ്ടുള്ള മാമാങ്കത്തിനു ശേഷമുള്ള പദ്മകുമാറിന്റെ മലയാള ചിത്രമാണിത്. ജോജു ജോർജിനെ നായകനാക്കിയുള്ള ജോസഫ് വലിയ വിജയമായിരുന്നു. ഈ ചിത്രത്തിന്റെ തമിഴ് റീമേക്കും ഒരുക്കുന്നത് പദ്മകുമാർ തന്നെയാണ്. 'വിചിത്തിരന്‍' എന്നു പേരിട്ടിരിക്കുന്ന റീമേക് ചിത്രത്തിൽ ആര്‍ കെ സുരേഷ് ആണ് പ്രധാന വേഷത്തിലെത്തുന്നത്. ബി സ്റ്റുഡിയോസിന്‍റെ ബാനറില്‍ സംവിധായകന്‍ ബാലയാണ് ചിത്രം നിര്‍മ്മിക്കുന്നത്.