സോഷ്യല്‍ മീഡിയയ്ക്ക് തീയിട്ട് മോഹന്‍ലാല്‍. ഇന്‍സ്റ്റഗ്രാമും ഫെയ്‌സ്ബുക്കുമടക്കം സകല സോഷ്യല്‍ മീഡിയ പ്ലാറ്റ്‌ഫോമുകളിലും കത്തിക്കയറുകയാണ് മോഹന്‍ലാലിന്റെ പാട്ടും ഡാന്‍സുമൊക്കെ. വിദേശത്ത് അരങ്ങേറിയ സ്റ്റേജ് ഷോയില്‍ പാട്ടു പാടുകയും ഡാന്‍സ് ചെയ്യുകയും ചെയ്യുന്ന മോഹന്‍ലാലിന്റെ വിഡിയോകളാണ് ഇപ്പോള്‍ സോഷ്യല്‍ മീഡിയയിലെ ചര്‍ച്ചാ വിഷയം.

ഏപ്രില്‍ 17 ന് ഹൂസ്റ്റണില്‍ നടന്ന കിലുക്കം 25 എന്ന പരിപാടിയില്‍ നിന്നുള്ളതാണ് വിഡിയോകള്‍. കറുത്ത ഷര്‍ട്ടും മുണ്ടും ധരിച്ച്, കൂളിങ് ഗ്ലാസും വച്ച്, നരന്‍ സിനിമയിലെ വേല്‍ മുരുക എന്ന ഗാനമാണ് മോഹന്‍ലാല്‍ പാടുന്നത്. മോഹന്‍ലാലിനൊപ്പം മനോജ് കെ ജയന്‍, നോബി, സ്റ്റീഫന്‍ ദേവസി തുടങ്ങിയവരും വിഡിയോയിലുണ്ട്.

മോഹന്‍ലാലിന്റെ എനര്‍ജിയെക്കുറിച്ചാണ് ആരാധകര്‍ കമന്റ് ചെയ്യുന്നത്. വേല്‍മുരുകാ പാട്ടിലെ തന്റെ ചുവടുകളും മോഹന്‍ലാല്‍ പുനര്‍ അവതരിപ്പിക്കുന്നുണ്ട്. ഇതിനൊപ്പം ഛോട്ടാ മുംബൈയിലെ വാസ്‌കോ ഡ ഗാമ വെന്റ് ടു ദ ഡ്രാമ എന്ന ഗാനവും മോഹന്‍ലാല്‍ ആലപിക്കുന്നുണ്ട്. മോഹന്‍ലാലിനൊപ്പം സ്റ്റീഫന്‍ ദേവസിയുടെ കീബോര്‍ഡ് വായനയും സോഷ്യല്‍ മീഡിയയുടെ കയ്യടി നേടുകയാണ്.