'വീട്ടിൽ പോയി ഞാനെന്റെ ഷൂ എടുത്തു കൊണ്ട് വന്നു, കല്യാണിയുടെ ഔട്ട്ഫിറ്റ് ആദ്യം ശരിയായില്ല'; കിളിയേ കിളിയേ പാട്ടിനെക്കുറിച്ച് ശാന്തി

ലോക ചാപ്റ്റർ 1: ചന്ദ്രയുടെ ഓരോ വിശേഷങ്ങളും ഒന്നൊന്നായി അണിയറപ്രവർത്തകർ പുറത്തുവിട്ടുകൊണ്ടിരിക്കുകയാണ്. വലിയ ആവേശത്തോടെയാണ് സിനിമാ പ്രേക്ഷകർ ഇതൊക്കെ സ്വീകരിക്കുന്നതും. ലോക യൂണിവേഴ്സിലെ ആദ്യത്തെ ചിത്രമാണ് ചന്ദ്ര. കല്യാണി പ്രിയദർശൻ ആണ് ചന്ദ്രയിൽ മെയിൻ കഥാപാത്രമായെത്തിയത്. ആക്ഷൻ രം​ഗങ്ങളിലടക്കം കല്യാണിയെ പ്രേക്ഷകരെ ഞെട്ടിച്ചു കളഞ്ഞു.

ലോകയിൽ ഉൾപ്പെടുത്തിയിരിക്കുന്ന കിളിയേ കിളിയേ... എന്ന പാട്ടും അതിലെ കല്യാണിയുടെ സ്ക്രീൻ പ്രെസൻസും ചിത്രം കണ്ടവരാരും മറക്കാനിടയില്ല. കല്യാണിയുടെ കിടിലൻ എൻട്രിയ്ക്ക് പ്രചോദനമായത് 2023 ൽ ഡിജെ ശങ്കർ റീമിക്സ് ചെയ്ത കിളിയേ കിളിയേ ആയിരുന്നു. ലോകയുടെ റിലീസിന് ശേഷം ഈ പാട്ട് തേടി എത്തിയവരുടെ എണ്ണവും പറഞ്ഞറിയിക്കാൻ ആകാത്തതാണ്.

ഇപ്പോഴിതാ ലോകയിലേക്ക് കിളിയേ കിളിയേ വന്നത് എങ്ങനെയാണെന്ന് പറയുകയാണ് തിരക്കഥാകൃത്ത് ശാന്തി. "എന്നെ ആകർഷിച്ചത് ആ പാട്ടിലെ ആ വരികളാണ്. ഡൊമിനികിന് അതിലൊരു പാർട്ടി വൈബുള്ള റെട്രോ ഫീൽ കൊണ്ടുവരുന്ന പാട്ട് വേണമെന്നായിരുന്നു ആ​ഗ്രഹം. ഇൻസ്റ്റഗ്രാമിൽ ഞാൻ ഈ പാട്ട് കണ്ടു. അതിലെ വരികളായ ഉയരങ്ങളിലൂടെ പല നാടുകൾ തേടി... എന്ന വരികളോട് എനിക്കൊരു കണക്ഷൻ തോന്നി.

നീലിയുടെ യാത്രയുമായി അത് ഇണങ്ങുമെന്ന് തോന്നി. ആ സീൻ എടുത്തപ്പോൾ ഞങ്ങളെല്ലാവരും ഭയങ്കര സ്ട്രെസിലൂടെയാണ് കടന്നു പോയത്. കല്യാണിയുടെ ഔട്ട്ഫിറ്റ് ആദ്യമൊന്നും ശരിയായിരുന്നില്ല. പിന്നെ ഞാൻ എന്റെ വീട്ടിൽ പോയി എന്റെ ഷൂസ് എടുത്ത് കൊണ്ടു വന്നു. അങ്ങനെ കോസ്റ്റ്യൂം ഡിസൈൻ ടീം അവിടെ വച്ച് വസ്ത്രം ഒരുക്കി തന്നു".- ശാന്തി പറഞ്ഞു.

അതോടൊപ്പം സിനിമയ്ക്ക് ലോക എന്ന പേരിട്ടത് ​ഗാനരചയിതാവ് വിനായക് ശശികുമാർ ആണെന്നും ശാന്തി വെളിപ്പെടുത്തി. "പേരിന്റെ മുഴുവൻ ക്രെഡിറ്റും ഗാനരചയിതാവ് വിനായക് ശശികുമാറിനാണ്. 'ശോകമൂകം' എന്ന ഗാനത്തിന്റെ പണിപ്പുരയിലായിരുന്നു ആ സമയത്ത് അദ്ദേഹം. ഞങ്ങൾക്ക് നിരവധി ഓപ്ഷനുകൾ ഉണ്ടായിരുന്നു.

പക്ഷേ ആരും അതിലൊന്നിലും പൂർണമായും തൃപ്തരായിരുന്നില്ല. നമ്മൾ ഒരു പുതിയ ലോകത്തെ പരിചയപ്പെടുത്തുന്നതിനാൽ 'ലോക' എന്ന് പറയുന്നത് വളരെ ഉചിതമാണെന്ന് തോന്നി".- ശാന്തി പറഞ്ഞു. 1983 ൽ പുറത്തിറങ്ങിയ ‘ആ രാത്രി’ എന്ന സിനിമയിലെ ഗാനമാണ് ‘കിളിയേ കിളിയേ’. പൂവച്ചൽ ഖാദറിന്റെ വരികൾക്ക് സംഗീതം നൽകിയത് ഇളയരാജയാണ്. എസ് ജാനകി ആണ് ഗാനം ആലപിച്ചിരിക്കുന്നത്.