അമിതവേഗതയില്‍ വാഹനമോടിച്ച് പിടിക്കപ്പെട്ടാല്‍ കടുത്ത ശിക്ഷ; കുവൈത്തില്‍ മുന്നറിയിപ്പ്

കുവൈത്ത് സിറ്റി: കുവൈത്തിലെ റോഡുകളില്‍ അമിതവേഗതയില്‍ വാഹനമോടിച്ച് പിടിക്കപ്പെട്ടാല്‍ കടുത്ത ശിക്ഷ. അമിതവേഗത ഉള്‍പ്പെടെയുള്ള ഗുരുതരമായ നിരവധി ഗതാഗത നിയമലംഘനങ്ങള്‍ കണ്ടെത്തിയതിനെ തുടര്‍ന്ന് ജനറല്‍ ഡിപ്പാര്‍ട്ട്മെന്റ് ഓഫ് ട്രാഫിക് പരിശോധന ശക്തമാക്കി. വാഹനാപകടങ്ങള്‍ കുറയ്ക്കുന്നതിനും ജനങ്ങളുടെ ജീവനും സ്വത്തിനും സംരക്ഷണം നല്‍കുന്നതിനുമുള്ള തുടര്‍ച്ചയായ നടപടികളുടെ ഭാഗമായി പ്രധാന റോഡുകളിലും ഹൈവേകളിലും ട്രാഫിക് പട്രോളിങ് ശക്തമാക്കിയിട്ടുണ്ട്.

പിഴ ചുമത്തുന്നതിനപ്പുറം, ഗതാഗത സുരക്ഷാ മാനദണ്ഡങ്ങള്‍ പാലിക്കുന്നുണ്ടെന്ന് ഉറപ്പാക്കാനും മറ്റ് യാത്രക്കാരുടെ ജീവന് ഭീഷണിയാകുന്ന രീതിയില്‍ അശ്രദ്ധമായി വാഹനമോടിക്കുന്നവരെ നിലക്കു നിര്‍ത്താനുമാണ് ഈ ക്യാംപയ്നിലൂടെ ലക്ഷ്യമിടുന്നത്. ഗതാഗത നിയമങ്ങള്‍ എല്ലാവര്‍ക്കും ഒരേപോലെ ബാധകമാണെന്നും നിയമലംഘകര്‍ക്കെതിരെ കര്‍ശന നിയമനടപടികള്‍ സ്വീകരിക്കുമെന്നും അധികൃതര്‍ വ്യക്തമാക്കി.

നിയമലംഘകര്‍ സ്വദേശികളാണെങ്കില്‍ അവരെ ട്രാഫിക് പൊലീസ് സ്റ്റേഷനില്‍ തടങ്കലില്‍ വെയ്ക്കുകയും, പ്രവാസികളാണെങ്കില്‍ അവരെ രാജ്യത്തുനിന്ന് നാടുകടത്തുകയുമാണ് ചെയ്യുക. വാഹനം നിയന്ത്രണം വിടാനും ഗുരുതരമായ പരിക്കുകള്‍ക്കും മരണങ്ങള്‍ക്കും കാരണമാകുന്ന വലിയ അപകടങ്ങളിലേക്ക് നയിക്കാനും സാധ്യതയുള്ളതിനാല്‍, അമിതവേഗത ഏറ്റവും അപകടകരമായ നിയമലംഘനമായാണ് ട്രാഫിക് വിഭാഗം കണക്കാക്കുന്നത്.