രൂപയുടെ റെക്കോര്‍ഡ് തകര്‍ച്ചയില്‍ പ്രവാസികള്‍ക്ക് നേട്ടം; പണം അയക്കാന്‍ നല്ല സമയം

ദുബൈ: യുഎസ് ഡോളറിനെതിരെ രൂപയുടെ മൂല്യത്തില്‍ റെക്കോര്‍ഡ് തകര്‍ച്ചയില്‍ പ്രവാസികള്‍ക്ക് നേട്ടം. ഇതാദ്യമായി വിപണിയില്‍ ഒരു യുഎസ് ഡോളറിന് 96 രൂപ എന്ന നിലവാരത്തിന് താഴേക്ക് രൂപ എത്തിയതോടെ യുഎഇ ദിര്‍ഹവുമായുള്ള വിനിമയ നിരക്ക് 26 രൂപയും കടന്നു. പശ്ചിമേഷ്യയിലെ സംഘര്‍ഷവും യു.എസ്-ഇറാന്‍ വെടിനിര്‍ത്തല്‍ കരാറിലെ അനിശ്ചിതത്വവുമാണ് രൂപയുടെ ഇടിവിന് കാരണം.

രൂപയുടെ തകര്‍ച്ചയില്‍ നാട്ടിലേക്ക് പണമയക്കുന്ന പ്രവാസികള്‍ക്ക് വലിയ നേട്ടമാണ് ലഭിക്കുന്നത്. ഗള്‍ഫ് രാജ്യങ്ങളില്‍ നിന്ന് നാട്ടിലേക്ക് പണമയക്കുന്നവര്‍ക്ക് ഈ സാഹചര്യം അനുകൂലമാണ്. രൂപയുടെ മൂല്യം കുറഞ്ഞതോടെ കൂടുതല്‍ പണം ലഭിക്കുന്നതിനാല്‍ പലരും വലിയ തുകകള്‍ കൈമാറാന്‍ താല്പര്യം കാണിക്കുന്നുണ്ട്. ഇതിനായി ബാങ്ക് വായ്പകള്‍ക്കും പലരും ശ്രമിക്കുന്നു. വരും ദിവസങ്ങളിലും രൂപയുടെ മൂല്യം ഇതേ നിലയില്‍ തുടരുകയോ കൂടുതല്‍ ഇടിയുകയോ ചെയ്യാന്‍ സാധ്യതയുണ്ടെന്നാണ് വിപണി വിദഗ്ധരുടെ വിലയിരുത്തല്‍.

യുഎഇ ദിര്‍ഹമിന് അടുത്തിടെ ലഭിക്കുന്ന ഏറ്റവും ഉയര്‍ന്ന നിരക്കാണിത്. യുഎസ്- ഇറാന്‍ സംഘര്‍ഷത്തിന് പിറകെ രൂപയുടെ മൂല്യത്തില്‍ വലിയ ഇടിവ് സംഭവിക്കുകയും ദിര്‍ഹമിന് 25.80 രൂപ എന്ന നിലയിലേക്ക് വിനിമയ നിരക്ക് ഉയരുകയും ചെയ്തിരുന്നു. ഇതാണ് ചൊവ്വാഴ്ച ചരിത്രത്തിലെ എറ്റവും വലിയ ഉയര്‍ച്ചയില്‍ എത്തിയത്. കഴിഞ്ഞ ആഴ്ച രേഖപ്പെടുത്തിയ 95.4325 എന്ന എക്കാലത്തെയും താഴ്ന്ന നിരക്കിനെയാണ് രൂപ മറികടന്നത്.