ബിഗ് ബി താരം നഫീസ അലി തൃണമുൽ കോൺഗ്രസിൽ; പാർട്ടി പ്രവേശനം മമതയുടെ സാന്നിധ്യത്തിൽ, ചിത്രങ്ങൾ 

പനാജി: നടിയും മുൻ മിസ് ഇന്ത്യയുമായ നഫീസ അലിയും മൃനാളിനി ദേശ്പ്രഭുവും തൃണമുൽ കോൺഗ്രസിൽ ചേർന്നു. ഗോവയിൽ പാർട്ടി അധ്യക്ഷയും പശ്ചിമ ബംഗാൾ മുഖ്യമന്ത്രിയുമായ മമത ബാനർജിയുടെ സാന്നിധ്യത്തിലായിരുന്നു ഇരുവരുടെയും പാർട്ടി പ്രവേശനം.  2022ലെ നിയമസഭ തെര​ഞ്ഞെടുപ്പിൽ ഗോവയിൽ ചുവടുറപ്പിക്കുന്നതിൻറെ ഭാഗമായാണ്​ പ്രമുഖരെ പാർട്ടിയിൽ അണിനിരത്തുന്നത്​.

നഫീസ അലിയും മൃനാളിനി ദേശ്പ്രഭുവും തൃണമുൽ കുടുംബത്തിൽ ചേർന്നെന്നും ഇരുവരെയും പാർട്ടിയിലേക്ക് സ്വാ​ഗതം ചെയ്യുന്നെന്നും ടിഎംസി ട്വിറ്ററിൽ കുറിച്ചു. 

ബിഗ്​ ബിയിലെ മേരി ടീച്ചർ

മമ്മൂട്ടിയുടെ ബിഗ്​ ബി എന്ന ചിത്രത്തിലൂടെ മലയാളികൾക്ക് പ്രിയങ്കരിയായി മാറിയ നടിയാണ്​ നഫീസ അലി. മേരി ജോൺ കുരിശിങ്കൽ എന്ന കഥാപാത്രത്തെയാണ്​ ബിഗ്​ബിയിൽ നഫീസ അവതരിപ്പിച്ചത്​. സാമൂഹ്യപ്രവർത്തക കൂടിയായ നഫീസ അലി എയിഡ്സ് ബോധവത്കരണ മേഖലയിൽ പ്രവർത്തിക്കുന്ന ആക്ഷൻ ഇന്ത്യ എന്ന സംഘടനയുടെ പ്രവർത്തനങ്ങളിൽ സജീവമാണ്. 2004-ലെ ലോക്സഭാ തെരഞ്ഞെടുപ്പിൽ സൗത്ത് കൊൽക്കത്ത മണ്ഡലത്തിൽ മത്സരിച്ച് പരാജയപ്പെട്ടു. 1976-ൽ പത്തൊൻപതാം വയസിൽ ഫെമിന മിസ്സ് ഇന്ത്യ കിരീടം ചൂടിയിട്ടുണ്ട്.