ന്യൂഡല്‍ഹി: ആര്‍എസ്എസ് ആശയത്തില്‍ വിശ്വസിക്കുന്നവരെ കോണ്‍ഗ്രസിന് ആവശ്യമില്ലെന്ന് രാഹുല്‍ ഗാന്ധി. ബിജെപിയെ ഭയക്കുന്നവര്‍ കോണ്‍ഗ്രസില്‍ വേണ്ടെന്നും അദ്ദേഹം തുറന്നടിച്ചു. പാര്‍ട്ടി സോഷ്യല്‍ മീഡിയ ഡിപ്പാര്‍ട്ട്‌മെന്റ് യോഗത്തിലാണ് രാഹുലിന്റെ പ്രതികരണം.

' കോണ്‍ഗ്രസിന് പുറത്ത് ഭയമില്ലാത്ത നിരവധിപേരുണ്ട്. അവരെ പാര്‍ട്ടിയിലേക്ക് കൊണ്ടുവരണം. ബിജെപിയെ പേടിക്കുന്നവര്‍ പുറത്തുപോണം. ആര്‍എസ്എസ് ആശയത്തില്‍ വിശ്വസിക്കുന്നവരെ കോണ്‍ഗ്രസിന് വേണ്ട. നമുക്ക് ഭയമില്ലാത്ത ആളുകളെയാണ് വേണ്ടത്'-രാഹുല്‍ പറഞ്ഞു. 

ഓണ്‍ലൈനായാണ് സോഷ്യല്‍ മീഡിയ ഡിപ്പാര്‍ട്ട്‌മെന്റ് അംഗങ്ങളോട് രാഹുല്‍ സംവദിച്ചത്. സാമൂഹ്യ മാധ്യമങ്ങളില്‍ കൂടുതല്‍ കാര്യക്ഷമമായ പ്രവര്‍ത്തനങ്ങള്‍ക്ക് ഊന്നല്‍ നല്‍കണമെന്ന് രാഹുല്‍ കോണ്‍ഗ്രസ് പ്രവര്‍ത്തകരോട് ആവശ്യപ്പെട്ടു.