ന്യൂഡൽഹി: ഡൽഹി കൊണാട്ട് പ്ലേസിലെ സെൻട്രൽ പാർക്കിൽ ദേശീയപതാക ഉയർത്താൻ ആഹ്വാനം നൽകിയ കോക്‌റോച്ച് ജനതാ പാർട്ടി സ്ഥാപകൻ അഭിജിത് ദിപ്കെയെ നാടകീയ രംഗങ്ങൾക്കൊടുവിൽ ഡൽഹി പൊലീസ് കസ്റ്റഡിയിലെടുത്തു. മണിക്കൂറുകൾ നീണ്ട അനിശ്ചിതത്വങ്ങൾക്കൊടുവിൽ വീട്ടിൽ നിന്നിറങ്ങിയ ഉടൻ തന്നെ വസതിക്ക് മുന്നിൽ വെച്ച് പൊലീസ് ഇയാളെ കരുതൽ തടങ്കലിലാക്കുകയായിരുന്നു.

കൊണാട്ട് പ്ലേസ് മേഖലയിൽ നിരോധനാജ്ഞ പ്രഖ്യാപിച്ചിട്ടുള്ളതിനാൽ വൈകിട്ട് അഞ്ച് മണിക്ക് സെൻട്രൽ പാർക്കിലേക്ക് പോകാൻ കഴിയില്ലെന്ന് കാട്ടി മണിക്കൂറുകളോളം ദിപ്കെയുടെ താമസസ്ഥലത്ത് പൊലീസ് ക്യാമ്പ് ചെയ്യുകയും രേഖകളിൽ ഒപ്പുവെപ്പിക്കുകയും ചെയ്തിരുന്നു. എന്നാൽ പിന്നോട്ട് പോകാൻ തയ്യാറാകാതിരുന്ന ദിപ്കെ കൈയിൽ ദേശീയപതാകയുമായി പുറത്തേക്ക് ഇറങ്ങുകയായിരുന്നു.

വീട്ടുപടിക്കൽ തടഞ്ഞ് പൊലീസ്; രൂക്ഷമായ വാഗ്വാദം

വീടിന് വെളിയിലേക്ക് കാൽവെച്ച നിമിഷങ്ങൾക്കുള്ളിൽ തന്നെ പൊലീസ് ഉദ്യോഗസ്ഥർ ഇയാളെ തടയുകയും കസ്റ്റഡിയിലെടുക്കുകയാണെന്ന് വ്യക്തമാക്കുകയും ചെയ്തു. തുടർന്ന് പൊലീസും ദിപ്കെയും തമ്മിൽ രൂക്ഷമായ വാഗ്വാദമുണ്ടായി. താൻ ഒരു നിയമവും ലംഘിച്ചിട്ടില്ലെന്നും ഒരു പ്രതിഷേധവും നടത്തുന്നില്ലെന്നും ദേശീയപതാക ഉയർത്താൻ മാത്രമാണ് പോകുന്നതെന്നും ദിപ്കെ വാദിച്ചു. ഒപ്പമുള്ളത് മാധ്യമപ്രവർത്തകർ മാത്രമാണെന്നും അദ്ദേഹം ചൂണ്ടിക്കാട്ടി.

"നിങ്ങൾക്ക് അവിടേക്ക് പോകാൻ കഴിയില്ല," എന്ന് പൊലീസ് ഉദ്യോഗസ്ഥൻ പറഞ്ഞപ്പോൾ, "എങ്കിൽ ഞാൻ പോകേണ്ട മറ്റൊരു സ്ഥലത്തിന്റെ പേര് പറയൂ" എന്ന് ദിപ്കെ തിരിച്ചടിച്ചു. മറ്റൊരു സ്ഥലം പിന്നീട് അനുവദിക്കാമെന്നും നിലവിൽ ന്യൂഡൽഹിയിലേക്ക് പോകാൻ അനുവാദമില്ലാത്തതിനാൽ കരുതൽ തടങ്കലിലാക്കുകയാണെന്നും പൊലീസ് വ്യക്തമാക്കി. "ഞാൻ എന്ത് കുറ്റമാണ് ചെയ്തത്, ഏത് നിയമമാണ് ലംഘിച്ചത്? പിന്നെങ്ങനെ എന്നെ തടഞ്ഞുവെക്കാൻ കഴിയും?" എന്ന് ദിപ്കെ ക്ഷോഭത്തോടെ ചോദിച്ചെങ്കിലും പൊലീസ് നിലപാടിൽ ഉറച്ചുനിന്നു.