ഉദയനിധി സ്റ്റാലിൻ തമിഴ്നാട് പ്രതിപക്ഷ നേതാവ്

ചെന്നൈ: തമിഴ്നാട് മുൻ ഉപമുഖ്യമന്ത്രി ഉദയനിധി സ്റ്റാലിൻ ഇനി പ്രതിപക്ഷ നേതാവ്. ഡിഎംകെ നിയമസഭാ കക്ഷി നേതാവായി അദ്ദേഹത്തെ തെരഞ്ഞെടുത്തു. സഭയിലെ രണ്ടാമത്തെ വലിയ പാർട്ടി നേതാവെന്ന നിലയിൽ അദ്ദേഹം പ്രതിപക്ഷത്തെ നയിക്കും.

തമിഴക വെട്രി കഴകം (ടിവികെ) അധ്യക്ഷൻ വിജയ് തമിഴ്നാടിന്റെ ഒൻപതാം മുഖ്യമന്ത്രിയായി ഇന്ന് സത്യപ്രതിജ്ഞ ചെയ്ത് അധികാരമേറ്റിരുന്നു. പിന്നാലെയാണ് ഡിഎംകെ പ്രതിപക്ഷ നേതാവിനെ പ്രഖ്യാപിച്ചത്.

ചെന്നൈ അണ്ണാ അറിവാലയത്തിൽ ചേർന്ന പാർട്ടി യോ​ഗത്തിലാണ് സ്റ്റാലിനെ തെരഞ്ഞെടുത്തത്. പാർട്ടി അധ്യക്ഷനും മുൻ മുഖ്യമന്ത്രിയുമായ എംകെ സ്റ്റാലിന്റെ അധ്യക്ഷതയിലായിരുന്നു യോ​ഗം.

ചെന്നൈയിലെ ചെപ്പോക്കിൽ ടിവികെയിലെ സെൽവം ഡിക്കെതിരെ 7,140 വോട്ടുകളുടെ ഭൂരിപക്ഷത്തിനാണ് ഉദയനിധി സ്റ്റാലിൻ വിജയിച്ചത്. ഉദയനിധി 62,992 വോട്ടുകളും സെൽവം 55,852 വോട്ടുകളും നേടി.