ന്യൂഡൽഹി: മാധ്യമങ്ങൾ ഉൾപ്പെടെ രാജ്യത്തെ ഒട്ടുമിക്ക സ്വതന്ത്ര സ്ഥാപനങ്ങളെയും കൈപ്പിടിയിലൊതുക്കിയ കേന്ദ്ര സർക്കാർ ഇപ്പോൾ സുപ്രീം കോടതിയെയും വരുതിയിലാക്കാൻ ശ്രമിക്കുകയാണെന്ന് മുതിർന്ന അഭിഭാഷകനും രാജ്യസഭാ എംപിയുമായ കപിൽ സിബൽ. എന്നാൽ പരമോന്നത നീതിപീഠത്തെ വരുതിയിലാക്കാനുള്ള കേന്ദ്രത്തിന്റെ നീക്കം ഒരിക്കലും വിജയിക്കില്ലെന്ന് തനിക്ക് പൂർണ്ണ വിശ്വാസമുണ്ടെന്നും അദ്ദേഹം വ്യക്തമാക്കി. മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെ ഉയർന്ന പ്രതിഷേധങ്ങളോടുള്ള കേന്ദ്ര സർക്കാരിന്റെ സമീപനത്തെക്കുറിച്ച് വാർത്താസമ്മേളനത്തിൽ സംസാരിക്കുകയായിരുന്നു സിബൽ.

2014-ൽ അധികാരത്തിൽ വന്നതുമുതൽ ഭരണഘടനാ സ്ഥാപനങ്ങളെയും മറ്റ് സംവിധാനങ്ങളെയും ഒന്നൊന്നായി പിടിച്ചെടുക്കുന്ന തന്ത്രമാണ് കേന്ദ്ര സർക്കാർ സ്വീകരിക്കുന്നതെന്ന് അദ്ദേഹം ആരോപിച്ചു. ഭരണത്തിൻറെ അടിത്തറ മുതലുള്ള യാഥാർത്ഥ്യങ്ങൾ ജനങ്ങളിലേക്ക് എത്താതിരിക്കാൻ ആദ്യം മുഖ്യധാരാ മാധ്യമങ്ങളെയാണ് അവർ വരുതിയിലാക്കിയത്. മാധ്യമ പ്രവർത്തനങ്ങളെ ഇത് സാരമായി ബാധിച്ചതോടെയാണ് ജനങ്ങൾക്ക് സത്യമറിയാൻ സാമൂഹിക മാധ്യമങ്ങളെ ബദലായി ആശ്രയിക്കേണ്ടി വന്നതെന്നും സിബൽ ചൂണ്ടിക്കാട്ടി.

ലക്ഷ്യം സുപ്രീം കോടതിയും വോട്ടർപട്ടികയും

"ആദ്യം അവർ മാധ്യമങ്ങളെ വരുതിയിലാക്കി. അതിനുശേഷം സർവകലാശാലകളും ഗവർണർമാരുടെ ഓഫീസുകളും ഉൾപ്പെടെയുള്ള മറ്റ് സ്ഥാപനങ്ങളെ വരുതിയിലാക്കാൻ തുടങ്ങി. എന്നാൽ ഇന്നും അവരുടെ പിടിയിലൊതുങ്ങാതെ നിൽക്കുന്ന ഒരേയൊരു സ്ഥാപനമുണ്ട്, അതാണ് ഇന്ത്യൻ സുപ്രീം കോടതി. നീതിപീഠത്തെയും വരുതിയിലാക്കാൻ അവർ നിരന്തരം ശ്രമിക്കുന്നുണ്ട്. എന്നാൽ അത് ഒരിക്കലും സംഭവിക്കില്ലെന്ന് എനിക്ക് പൂർണ്ണ ബോധ്യമുണ്ട്. അവിടെയും കാര്യങ്ങൾ നടക്കാതായതോടെയാണ് എങ്ങനെ വോട്ടർപട്ടിക കൈപ്പിടിയിലാക്കാം എന്ന് അവർ ചിന്തിച്ചു തുടങ്ങിയത്," കപിൽ സിബൽ കുറ്റപ്പെടുത്തി.

ഡൽഹിയിൽ പ്രതിഷേധക്കാരെ അറസ്റ്റ് ചെയ്യുന്നതിനെയും ഒത്തുചേരലുകൾക്ക് നിയന്ത്രണങ്ങൾ ഏർപ്പെടുത്തുന്നതിനെയും സിബൽ രൂക്ഷമായി വിമർശിച്ചു. ഭരണഘടന ഉറപ്പുനൽകുന്ന മൗലികാവകാശമാണ് സമാധാനപരമായി പ്രതിഷേധിക്കാനുള്ള സ്വാതന്ത്ര്യമെന്നും ക്രമസമാധാന പ്രശ്നങ്ങൾ പോലുള്ള ഭരണഘടനാപരമായ കാരണങ്ങളില്ലാതെ പൗരന്മാരുടെ ഈ അവകാശം തടയാനാകില്ലെന്നും അദ്ദേഹം വ്യക്തമാക്കി.

നിരോധനാജ്ഞയ്ക്കെതിരെ സുപ്രീം കോടതിയെ സമീപിക്കും

ഭാരതീയ നാഗരിക് സുരക്ഷാ സംഹിതയുടെ 163-ാം വകുപ്പ് പ്രകാരം വ്യാപകമായി നിരോധനാജ്ഞ പ്രഖ്യാപിക്കുന്ന പൊലീസ് നടപടിയെയും അദ്ദേഹം ചോദ്യം ചെയ്തു. ഇത്തരം കർശന നിയന്ത്രണങ്ങൾ ഏർപ്പെടുത്തുന്നത് എന്തുകൊണ്ടാണെന്ന് ബോധ്യപ്പെടുത്താൻ അധികാരികൾക്ക് ബാധ്യതയുണ്ട്. നിരോധനാജ്ഞകളുടെ നിയമസാധുത ചോദ്യം ചെയ്തുകൊണ്ടുള്ള ഹർജികൾ സുപ്രീം കോടതിക്ക് മുന്നിലുണ്ടെന്നും ഇക്കാര്യം കോടതിയിൽ വിശദമായി ഉന്നയിക്കുമെന്നും അദ്ദേഹം കൂട്ടിച്ചേർത്തു.

സ്വതന്ത്ര സ്ഥാപനങ്ങളെ നിഷ്ക്രിയമാക്കുന്ന സർക്കാരിന്റെ നയങ്ങളെ പരമോന്നത നീതിപീഠം ഗൗരവമായി കാണുമെന്നും ജനങ്ങളുടെ പ്രതിഷേധിക്കാനുള്ള അവകാശങ്ങൾ കോടതി സംരക്ഷിക്കുമെന്നും സിബൽ ആത്മവിശ്വാസം പ്രകടിപ്പിച്ചു