ഫോണിന്റെ പാസ്‌വേഡ് പോലും മറന്നു; ഡോക്ടറുടെ കുടുംബത്തെ കണ്ടെത്തി പൊലീസ്

ചെന്നൈ: തമിഴ്‌നാട് പൊലീസ് മാസങ്ങളായി അന്വേഷിക്കുന്ന വനിതാ ഡോക്ടറുടെ മിസ്സിങ് കേസ് ദിവസങ്ങള്‍ കൊണ്ട് പരിഹരിച്ചിരിക്കുകയാണ് കേരള പൊലീസ്. കൃത്യമായ ഓര്‍മകളില്ലാതെ ഫെബ്രുവരി ഒന്നിന് വൈറ്റില ഹബ്ബില്‍ കണ്ടെത്തിയ വനിതയുടെ വേരുകള്‍ തേടിയുള്ള കൊച്ചി വനിതാ പൊലീസ് സ്റ്റേഷനിലെ ഉദ്യോഗസ്ഥരുടെ അന്വേഷണമാണ് ഒരു കുടുംബത്തിന്റെ പുനഃസമാഗമത്തിലേക്ക് എത്തിയത്.

തമിഴ്‌നാട് നാഗര്‍കോവിലില്‍ ഇക്കഴിഞ്ഞ ഡിസംബറില്‍ കാണാതായ വനിതാ ഡോക്ടറെ ഇന്ന് മാതാപിതാക്കളെത്തി കൊണ്ടുപോയി. വനിതാ ഡോക്ടറെ അന്വേഷിച്ച് നേരത്തേ തമിഴ്‌നാട് പൊലീസ് എറണാകുളത്ത് എത്തിയെങ്കിലും ആളെ കണ്ടെത്താനാവാതെ തിരികെ പോവുകയായിരുന്നു. ഈ സാഹചര്യത്തിലാണ് കേരള പൊലീസിന്റെ അന്വേഷണം, വയോധികരായ മാതാപിതാക്കള്‍ക്ക് മകളെ തിരിച്ചുനല്‍കിയിരിക്കുന്നത്.