ദേശീയപാതയില്‍ കാറിടിച്ച് പരിക്കേറ്റു; രക്ഷിക്കാനെത്തിയ വനംവകുപ്പ് ഉദ്യോഗസ്ഥനെ കടിച്ചുകുടഞ്ഞ് പുലി- വൈറല്‍ വിഡിയോ

ബംഗളൂരു: ദേശീയപാതയില്‍ വാഹനമിടിച്ച് പരിക്കു പറ്റിയ പുലിയെ പിടികൂടി ചികിത്സ നല്‍കാനുള്ള ശ്രമത്തിനിടെ, വനംവകുപ്പ് ഉദ്യോഗസ്ഥരെ ആക്രമിച്ചു. കാലിന് പരിക്ക് പറ്റി നടക്കാന്‍ കഴിയാതെ കഷ്ടപ്പെട്ട പുലിയെ രക്ഷിക്കാനുള്ള ശ്രമത്തിനിടെയാണ് വനംവകുപ്പ് ഉദ്യോഗസ്ഥന് നേരെ തിരിഞ്ഞത്. പുലിയുടെ ആക്രമണത്തില്‍ നിന്ന് കഷ്ടിച്ചാണ് വനംവകുപ്പ് ഉദ്യോഗസ്ഥന്‍ രക്ഷപ്പെട്ടത്. മറ്റു വനംവകുപ്പ് ഉദ്യോഗസ്ഥര്‍ ഉടന്‍ തന്നെ രക്ഷയ്ക്ക് എത്തിയതോടെ പുലി പിന്തിരിയുകയായിരുന്നു.

കര്‍ണാടക ദാവന്‍ഗരെയിലെ ഹൈവേയിലാണ് സംഭവം. കാര്‍ ഇടിച്ചാണ് പുലിക്ക് പരിക്ക് പറ്റിയത്. ഇതറിഞ്ഞ് പുലിയെ പിടികൂടി ചികിത്സ നല്‍കാനുള്ള ശ്രമത്തിനിടെയാണ് ഒരു വനംവകുപ്പ് ഉദ്യോഗസ്ഥന് നേരെ പുലി തിരിഞ്ഞത്. പുലിയുടെ ആക്രമണത്തില്‍ നിന്ന് വനംവകുപ്പ് ഉദ്യോഗസ്ഥന്‍ തലനാരിഴയ്ക്കാണ് രക്ഷപ്പെട്ടത്. ഇതിന്റെ ദൃശ്യങ്ങള്‍ വ്യാപകമായാണ് പ്രചരിക്കുന്നത്.

തുടര്‍ന്ന് മയക്കുവെടിവെച്ചാണ് പുലിയെ പിടികൂടിയത്. സാരമായി പരിക്ക് പറ്റിയ പുലിയെ തൊട്ടടുത്തുള്ള വെറ്ററിനറി ആശുപത്രിയില്‍ പ്രവേശിപ്പിച്ചു.