ന്യൂഡല്‍ഹി: ജന്തര്‍ മന്തറിനു പകരം ഡല്‍ഹിയിലെ സ്ഥിരം സമരവേദിയായി പ്രഖ്യാപിച്ച മൂന്ന് വേദികളിലൊന്നായ രാംലീല മൈതാനത്ത് ഈ വര്‍ഷം ഇനിയുള്ളത് മൂന്നു തീയതികള്‍ മാത്രം. ഡിസംബര്‍ 29, 30, 31 ദിവസങ്ങളില്‍ മാത്രമാണ് ഇനി രാംലീല മൈതാനം ബുക്ക് ചെയ്യാനാവുകയെന്ന് അധികൃതര്‍ അറിയിച്ചു. ഏകദേശം 50,000 പേരെ ഉള്‍കൊള്ളുന്ന രാംലീല മൈതാനം ഉപയോഗിക്കാന്‍ ഒരു ദിവസത്തേക്ക് നല്‍കേണ്ട തുക 1.21 ലക്ഷം രൂപയാണ്. സെക്യൂരിറ്റി ഡെപ്പോസിറ്റും നികുതിയും അടക്കമുള്ള തുകയാണിത്.

50,000 രൂപയാണ് ഒരു ദിവസം രാംലീല മൈതാനം ബുക്ക് ചെയ്യാനുള്ള ഫീസ്. ഇതിനൊപ്പം 55,000 രൂപ സെക്യൂരിറ്റി ഡെപ്പോസിറ്റും വേണം. ഈ തുക തിരികെ ലഭിക്കും. ഇതും നികുതിയും ചേര്‍ന്ന് 1.21 ലക്ഷം രൂപയാണ് സമരത്തിനുള്ള ചെലവ്. ഡല്‍ഹി കോര്‍പ്പറേഷന്റെ ഹോട്ടികള്‍ച്ചര്‍ വകുപ്പ് വഴിയാണ് മൈതാനം ബുക്ക് ചെയ്യാന്‍ സാധിക്കുക. ഡല്‍ഹി പൊലീസില്‍ നിന്നുള്ള നോഒബ്ജക്ഷന്‍ സര്‍ട്ടിഫിക്കറ്റുണ്ടെങ്കില്‍ മാത്രമെ സമരത്തിന് അനുമതി ലഭിക്കുകയുള്ളൂ.

പൊലീസ് കമ്മീഷണര്‍ അനുരാഗ് കുമാര്‍ ഒക്ടോബര്‍ 11-ന് പുറത്തിറക്കിയ ഉത്തരവ് പ്രകാരം ജന്തര്‍ മന്തറിലെ പ്രതിഷേധാനുമതി റദ്ദാക്കുകയും, വടക്കന്‍ ഡല്‍ഹിയിലെ ബുരാരി ഗ്രൗണ്ട്, കിഴക്കന്‍ ഡല്‍ഹിയിലെ സി.ബി.ഡി ഗ്രൗണ്ട്, രാംലീല മൈതാനം എന്നിവ പുതിയ പ്രതിഷേധ വേദികളായി പ്രഖ്യാപിക്കുകയും ചെയ്തിരുന്നു. ഇത് പിന്നാലെയാണ് പുതിയ നീക്കം.