ന്യൂഡല്‍ഹി:കോണ്‍ഗ്രസ് നേതാവ് രാഹുല്‍ ഗാന്ധി ദലിത്‌ യുവതിയെ വിവാഹം കഴിക്കണമെന്ന നിര്‍ദേശത്തിന് പിന്നാലെ വീണ്ടും കേന്ദ്രമന്ത്രി രാംദാസ് അതവാലെ. മിശ്രവിവാഹം ചെയ്യാന്‍ തയ്യാറായാല്‍  സര്‍ക്കാര്‍ പദ്ധതി അനുസരിച്ച് രണ്ടര ലക്ഷം രൂപ രാഹുല്‍ ഗാന്ധിക്ക് നല്‍കുമെന്ന് രാംദാസ് അതവാലെ വാഗ്ദാനം നല്‍കി.

പ്രധാനമന്ത്രി നരേന്ദ്രമോദിയെയും കേന്ദ്രമന്ത്രി അമിത് ഷായെയും വിമര്‍ശിച്ച് രാഹുല്‍ ഗാന്ധി നടത്തിയ പരാമര്‍ശത്തിന് മറുപടിയായാണ് രാംദാസ് അതവാലെ രാഹുല്‍ ഗാന്ധി ദലിത്‌ യുവതിയെ വിവാഹം കഴിക്കണമെന്ന നിര്‍ദേശം മുന്നോട്ടുവെച്ചത്. നാം ഒന്ന് നമുക്ക് രണ്ട് എന്ന സമീപനത്തിന്റെ അടിസ്ഥാനത്തില്‍ നാലുപേരാണ് രാജ്യത്തെ നിയന്ത്രിക്കുന്നതെന്ന് പാര്‍ലമെന്റില്‍ മോദിയെയും അമിത് ഷായെയും ഉദ്ദേശിച്ച് രാഹുല്‍ വിമര്‍ശിച്ചിരുന്നു. ഇതിന് മറുപടിയായാണ് നാം ഒന്ന് നമുക്ക് രണ്ട് എന്ന ആശയത്തെ പ്രോത്സാഹിപ്പിക്കാന്‍ ആഗ്രഹിക്കുന്നുവെങ്കില്‍ ദലിത് യുവതിയെ രാഹുല്‍ വിവാഹം ചെയ്യണമെന്ന് കേന്ദ്രമന്ത്രി നിര്‍ദേശിച്ചത്. രാഹുല്‍ഗാന്ധി വിവാഹം കഴിച്ചെങ്കില്‍ മാത്രമെ കോണ്‍ഗ്രസ് കൊണ്ടുവന്ന കുടുംബാസൂത്രണ മുദ്രാവാക്യമായ നാം ഒന്ന് നമുക്ക് രണ്ട് എന്ന മുദ്രാവാക്യം പ്രാവര്‍ത്തികമാകുകയുള്ളുവെന്നും അദ്ദേഹം പറഞ്ഞു.

രാഹുല്‍ ഒരു ദലിത് പെണ്‍കുട്ടിയെ വിവാഹം കഴിക്കുകയും ജാതീയത ഇല്ലാതാക്കാനുള്ള മഹാത്മ ഗാന്ധിയുടെ സ്വപ്നം നിറവേറ്റുകയും വേണം. ഇത് യുവാക്കള്‍ക്ക് പ്രചോദനമാകുമെന്നുമായിരുന്നു കേന്ദ്രമന്ത്രിയുടെ വാക്കുകള്‍. ഇതിന് പിന്നാലെയാണ് രണ്ടര ലക്ഷം രൂപയുടെ വാഗ്ദാനവുമായി മന്ത്രി രംഗത്തുവന്നത്.രാഹുല്‍ ഗാന്ധിയുടെ വിവാഹം വീണ്ടും ചര്‍ച്ചയാക്കിയാണ് കേന്ദ്രമന്ത്രി രംഗത്തെത്തിയത്. നേരത്തെയും രാഹുലിന്റെ വിവാഹത്തെ സംബന്ധിച്ച് ചര്‍ച്ചകള്‍ ഉയര്‍ന്നിരുന്നു