സ്മാര്‍ട്ട് ഫോണുകളുടെ അമിത ഉപയോഗം പുതിയ രോഗങ്ങള്‍ക്ക് കാരണമാകുന്നു; അച്ചടക്കം അത്യാവശ്യമെന്ന് യോഗി ആദിത്യനാഥ്

ലഖ്‌നൗ: പ്രതിദിനം 4 മുതല്‍ 6 മണിക്കൂര്‍ വരെ സ്മാര്‍ട്ട്ഫോണ്‍ ഉപയോഗിക്കുന്നത് പുതിയ രോഗങ്ങള്‍ക്ക് കാരണമാകുന്നുവെന്ന് ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥ്. അടല്‍ ബിഹാരി വാജ്പേയി മെഡിക്കല്‍ യൂണിവേഴ്സിറ്റിയില്‍ നടന്ന കാര്‍ഡിയോളജിക്കല്‍ സൊസൈറ്റി ഓഫ് ഇന്ത്യ കോണ്‍ഫറന്‍സില്‍ സംസാരിക്കുകയായിരുന്നു അദ്ദേഹം. പ്രമേഹത്തിന്റെ ദ്രുതഗതിയിലുള്ള വ്യാപനം ഒരു വലിയ വെല്ലുവിളിയാണെന്ന് ആദിത്യനാഥ് എടുത്തുപറഞ്ഞു. അമിതമായ സ്മാര്‍ട്ട്ഫോണ്‍ ഉപയോഗം ഒഴിവാക്കി ആരോഗ്യകരമായ ജീവിതശൈലിയും അച്ചടക്കമുള്ള ദിനചര്യയും പ്രോത്സാഹിപ്പിക്കാന്‍ അദ്ദേഹം അഭ്യര്‍ഥിച്ചു.

'മാറുന്ന ജീവിതശൈലി, പ്രത്യേകിച്ച് ദിവസവും നാല് മുതല്‍ ആറ് മണിക്കൂര്‍ വരെ സ്മാര്‍ട്ട്‌ഫോണ്‍ ഉപയോഗിക്കുന്നത് പുതിയ രോഗങ്ങളിലേക്ക് നയിക്കുന്നു. പ്രമേഹത്തിന്റെ അതിവേഗത്തിലുള്ള വ്യാപനവും വലിയൊരു വെല്ലുവിളിയായി ഉയര്‍ന്നു വന്നിട്ടുണ്ട്,' ആദിത്യനാഥ് പറഞ്ഞു. ഇങ്ങനെയുള്ള സാഹചര്യങ്ങളില്‍ സര്‍ക്കാര്‍ ശ്രമങ്ങള്‍ മാത്രം പര്യാപ്തമല്ലെന്നും വ്യാപകമായ ബോധവല്‍ക്കരണം അത്യന്താപേക്ഷിതമാണെന്നും അദ്ദേഹം പറഞ്ഞു.

ഡോക്ടര്‍മാരിലൂടെ സന്ദേശം ജനങ്ങളിലെത്തുമ്പോള്‍ അതിന്റെ സ്വാധീനം ആഴത്തിലുള്ളതും ശാശ്വതവുമാണെന്ന് ആദിത്യനാഥ് പറഞ്ഞു. 'ജീവിതശൈലിയിലെ മാറ്റവും ഭക്ഷണത്തിലെ വര്‍ധിച്ചുവരുന്ന മായം ചേര്‍ക്കലുമാണ് ഇന്ന് നേരിടുന്ന ഏറ്റവും വലിയ വെല്ലുവിളി. പണ്ട് ആളുകള്‍ കൃത്യസമയത്ത് ഉറങ്ങുകയും ഉണരുകയും സമീകൃതാഹാരം കഴിക്കുകയും ചെയ്തിരുന്നു. എന്നാല്‍ ഇന്ന് സാഹചര്യം പൂര്‍ണ്ണമായും മാറി,' മുഖ്യമന്ത്രി പറഞ്ഞു.

ആരോഗ്യ അടിസ്ഥാന സൗകര്യങ്ങള്‍ വിപുലീകരിക്കുന്നതിനും കുറഞ്ഞ ചെലവില്‍ ചികിത്സ ലഭ്യമാക്കുന്നതിനും സര്‍ക്കാര്‍ പ്രവര്‍ത്തിക്കുന്നുണ്ടെന്നും അദ്ദേഹം കൂട്ടിച്ചേര്‍ത്തു.