ചെന്നൈ: ആംഗ്യങ്ങളും ശരീരഭാഷയും പോലും തീവ്രമായ രാഷ്ട്രീയ ചർച്ചകൾക്ക് തിരികൊളുത്തുന്ന തമിഴകത്ത്, മുഖ്യമന്ത്രി വിജയിന്റെ ഒരു കൈയനക്കം ഭരണ-പ്രതിപക്ഷ പോരിന്റെ പുതിയ ആയുധമാകുന്നു. മുൻപ് എം.കെ. സ്റ്റാലിൻ കാട്ടിയതും പിന്നീട് നിയമസഭയിൽ വിജയ് പുനരാവിഷ്കരിച്ച് ട്രെൻഡാക്കിയതുമായ കൈയാംഗ്യത്തെ ആർഎസ്എസിന്റെ പതാക വന്ദനമായ 'ധ്വജ് പ്രണാമു'മായി ഉപമിച്ചാണ് ഡിഎംകെ ഇപ്പോൾ രംഗത്തെത്തിയിരിക്കുന്നത്.

കഴിഞ്ഞ മാർച്ചിൽ നടന്ന ഒരു സംഭവമാണ് ഈ രാഷ്ട്രീയ നാടകത്തിന് കളമൊരുക്കിയത്. സീറ്റ് വിഭജന ചർച്ചകൾ പൂർത്തിയായെന്ന് സൂചിപ്പിക്കാൻ ഡിഎംകെ ആസ്ഥാനത്തിന് മുന്നിൽ വെച്ച് അന്നത്തെ മുഖ്യമന്ത്രി എം.കെ. സ്റ്റാലിൻ കൈ വായുവിൽ വെട്ടി ഒരു ആംഗ്യം കാട്ടിയിരുന്നു. ചർച്ചകൾ തീർപ്പായെന്നായിരുന്നു ഇതിന്റെ അർത്ഥമെങ്കിലും, സ്റ്റാലിന്റെ അഹങ്കാരമാണിതെന്ന് പറഞ്ഞ് അന്ന് എഐഎഡിഎംകെ ഇതിനെ പരിഹസിച്ചു. എന്നാൽ മാസങ്ങൾക്ക് ശേഷം ജൂണിൽ, മുഖ്യമന്ത്രി കസേരയിലെത്തിയ വിജയ് തമിഴ്‌നാട് നിയമസഭയിൽ വെച്ച് ഇതേ ആംഗ്യം പുറത്തെടുത്തതോടെയാണ് കാര്യങ്ങൾ മാറിയത്.

പ്രതിപക്ഷമായ ഡിഎംകെ സഭ വിട്ടിറങ്ങിയ വേളയിൽ, സ്പീക്കർ ജെ.സി.ഡി. പ്രഭാകറുടെ അനുവാദത്തോടെ വിജയ് സ്റ്റാലിന്റെ പഴയ കൈയാംഗ്യം അതേപടി അനുകരിച്ചു കാണിച്ചു. ഭരണപക്ഷ എംഎൽഎമാരുടെ കരഘോഷത്തോടെ സ്വീകരിക്കപ്പെട്ട ഈ രംഗം ഞൊടിയിടയിലാണ് സമൂഹമാധ്യമങ്ങളിൽ തരംഗമായത്. ആക്ഷേപഹാസ്യപരമായ നീക്കം മാത്രമായിരുന്നു അതെന്ന് ടിവികെ നേതൃത്വം വിശദീകരിച്ചെങ്കിലും ഡിഎംകെ ഇതിനെതിരെ കടുത്ത വിമർശനമുന്നയിച്ചു.

ഇപ്പോൾ ഈ ആംഗ്യത്തിന് പിന്നിൽ സംഘപരിവാർ ബന്ധമുണ്ടെന്ന പുതിയ ആരോപണമാണ് ഡിഎംകെ ഐടി വിംഗ് മുന്നോട്ടുവെക്കുന്നത്. വിജയ് സ്ഥിരമായി വേദിയിൽ കാണിക്കുന്ന കൈയനക്കത്തിന് ആർഎസ്എസിന്റെ 'ധ്വജ് പ്രണാമു'മായി സാമ്യമുണ്ടെന്ന് വാദിക്കുന്ന പോസ്റ്റർ ഡിഎംകെ പുറത്തുവിട്ടു. ആർഎസ്എസ് ശാഖകളിൽ നടത്തുന്ന വന്ദന രീതിയും വിജയിന്റെ ആംഗ്യവും നേർക്കുനേർ വെച്ചുള്ള നിഴൽചിത്രമാണ് ഈ പോസ്റ്ററിലുള്ളത്. വിജയ് ആർഎസ്എസിന്റെ ദത്തുപുത്രൻ ആണെന്ന് കുറ്റപ്പെടുത്തുന്നതിലൂടെ, ടിവികെ ബിജെപിയുടെ ബി ടീം ആണെന്ന മുൻപത്തെ രാഷ്ട്രീയ ആക്ഷേപങ്ങൾക്ക് ആക്കം കൂട്ടുകയാണ് ഡിഎംകെ ലക്ഷ്യമിടുന്നത്.

മറുവശത്ത്, പാർട്ടി സമ്മേളനങ്ങളിലും റാലികളിലും വിജയിന്റെ ആരാധകരും പ്രവർത്തകരും ഈ ആംഗ്യം ഏറ്റെടുത്തു കഴിഞ്ഞു. അടുത്തിടെ സർക്കാർ മെഡിക്കൽ കോളേജ് വിദ്യാർഥികൾ വരെ ഇത് അനുകരിക്കുന്നതിന്റെ ദൃശ്യങ്ങൾ മന്ത്രി അരുൺ രാജ് പങ്കുവെച്ചിരുന്നു. ഒരു രാഷ്ട്രീയ ചർച്ചയുടെ വിജയസൂചനയായി ആരംഭിച്ച ലളിതമായ ഒരു കൈയാംഗ്യം, ഇപ്പോൾ വിജയിന്റെ രാഷ്ട്രീയ നിലപാടിനെതിരെയുള്ള കടന്നാക്രമണമായി മാറിയിരിക്കുകയാണ്.