'അയാള്‍ പെട്ടെന്ന് ലൈംഗികാവയവം പ്രദര്‍ശിപ്പിച്ചു'; പട്ടാപ്പകല്‍ മെട്രൊ സ്‌റ്റേഷനിലുണ്ടായ അതിക്രമം വെളിപ്പെടുത്തി യുവതി, കേസ്

ന്യൂഡല്‍ഹി: ഡല്‍ഹിയിലെ ജോര്‍ബാഗ് മെട്രൊ സ്‌റ്റേഷനില്‍ ലൈംഗിക അതിക്രമത്തിന് ഇരയായെന്ന യുവതിയുടെ വെളിപ്പെടുത്തലില്‍ പൊലീസ് കേസെടുത്തു. ജോര്‍ ബാഗ് സ്‌റ്റേഷനില്‍ ഒരാള്‍ തനിക്കു നേരെ നഗ്നത പ്രദര്‍ശിപ്പിച്ചെന്നും സ്ഥലത്തുണ്ടായിരുന്ന സിഐഎസ്എഫ് ഉദ്യോഗസ്ഥര്‍ യാതൊരു നടപടിയും സ്വീകരിച്ചില്ലെന്നും യുവതി ട്വിറ്ററില്‍ കുറിച്ചു. ട്വീറ്റിനെ അടിസ്ഥാനമാക്കിയാണ പൊലീസ് കേസ്. 

വ്യാഴാഴ്ച ഉച്ചയ്ക്ക് 1.50നു 1.55നു ഇടയിലാണ് സംഭവമെന്ന് യുവതി പറഞ്ഞു. 'കുറച്ച് ആളുകള്‍ മാത്രമാണ് സ്‌റ്റേഷനിലുണ്ടായിരുന്നത്. സ്റ്റേഷനില്‍ വച്ച് വഴി ചോദിച്ചുകൊണ്ട് ഒരാള്‍ സമീപിക്കുകയായിരുന്നു. അയാള്‍ക്കു വഴി പറഞ്ഞുകൊടുത്തു. ഇതിനുശേഷം കാബ് ബുക്ക് ചെയ്യാനായി പ്ലാറ്റ്‌ഫോമിലിരിക്കുമ്പോള്‍ വീണ്ടും അയാളെത്തി. സഹായത്തിനാണെന്ന് ഞാന്‍ വിചാരിച്ചു. എന്നാല്‍ വിലാസം അടങ്ങിയ ഫയല്‍ കാണിക്കാന്‍ ശ്രമിക്കുന്നതിനിടെ പെട്ടെന്ന് അയാള്‍ തന്റെ ലൈംഗികാവയവം പ്രദര്‍ശിപ്പിച്ചു.'- യുവതി പറഞ്ഞു.

'പെട്ടെന്നുണ്ടായ സംഭവത്തില്‍ ഞാന്‍ പകച്ചുപോയി. ഭയന്ന്, അവിടെനിന്ന് ഓടി. ഏതാനും ഉദ്യോഗസ്ഥര്‍ അവിടെയുണ്ടായിരുന്നു. പക്ഷേ സിസിടിവി ദൃശ്യങ്ങള്‍ ഉണ്ടായിരുന്നിട്ടും അവര്‍ ഒന്നും ചെയ്തില്ല. ഈ സാഹചര്യത്തെ എങ്ങനെ കൈകാര്യം ചെയ്യണം എന്നതിനെക്കുറിച്ച് ഉദ്യോഗസ്ഥര്‍ക്ക് പരിശീലനമൊന്നും ലഭിച്ചിട്ടില്ലായിരിക്കാം. ഇതുപോലെ എത്ര തവണ സംഭവങ്ങള്‍ നടന്നാലും ഒരു മാറ്റമില്ലാത്ത സ്ഥിതിയാണ്'' യുവതി എഴുതി.

സംഭവം ഗൗരവത്തോടെയാണ് കാണുന്നതെന്നും നടപടി സ്വീകരിക്കുമെന്നും ഡിഎംആര്‍സി അറിയിച്ചു.

ഈ വാര്‍ത്ത കൂടി വായിക്കൂ

കൂട്ട ബലാത്സംഗം നടന്നത് നേതാവിന്റെ കാറില്‍? ഒരു പ്രതി കൂടി പിടിയില്‍, മൂന്നു പേര്‍ പ്രായപൂര്‍ത്തിയാവാത്തവര്‍

സമകാലിക മലയാളം ഇപ്പോള്‍ വാട്ട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ