മാവോയിസ്റ്റ് ആക്രമണം: 24 സിആര്‍പിഎഫ് ജവാന്‍മാര്‍ കൊല്ലപ്പെട്ടു

റായ്പൂര്‍: ചത്തീസ്ഗഡിലെ സുഖ്മയിലുണ്ടായ മാവോയിസ്റ്റ് ആക്രമണത്തില്‍ 24 സിആര്‍പിഎഫ് ജവാന്‍മാര്‍ കൊല്ലപ്പെട്ടു. ആറുപേര്‍ക്ക് പരുക്കേറ്റു. ഇതില്‍ നാലുപേരുടെ നില ഗുരുതരമാണ്. സംഭവത്തെ തുടര്‍ന്ന് മുഖ്യമന്ത്രി അടിയന്തിരയോഗം വിളിച്ചു. 

സുഖ്മ മേഖലയില്‍ മാവോയിസ്റ്റുകളുമായുണ്ടായ ഏറ്റുമുട്ടലിലാണ് സിആര്‍പിഎഫുകാര്‍ കൊല്ലപ്പെട്ടത്. പ്രദേശത്ത് റോഡ് നിര്‍മ്മാണ പ്രവര്‍ത്തിയില്‍ ഏര്‍പ്പെട്ടിരിക്കുന്ന തൊഴിലാളികള്‍ക്ക് സംരക്ഷണം നല്‍കുന്നതിനിടെയായിരുന്നു ആയുധധാരികളായ മാവോയിസ്റ്റുകളുടെ ആക്രമണം.

സിആര്‍പിഎഫിന്റെ 74 ബറ്റാലിയനില്‍ ഉള്‍പ്പെട്ടവരാണ് കൊല്ലപ്പെട്ടത്. സംഭവസ്ഥലത്ത് ഇപ്പോഴും ഏറ്റുമുട്ടല്‍ തുടരുകയാണെന്നാണ് റിപ്പോര്‍ട്ട്. പരുക്കേറ്റവരെ ഹെലികോപ്ടറിലാണ് ആശുപത്രിയിലെത്തിച്ചത്. സംഭവസ്ഥലത്തേക്ക് കൂടുതല്‍ സിഅര്‍പിഎഫ് സംഘത്തെ അയക്കാന്‍ തീരുമാനിച്ചതായി ഉയര്‍ന്ന പൊലീസ് ഓഫീസര്‍ അറിയിച്ചു.

ഇക്കഴിഞ്ഞ മാര്‍ച്ചിലുണ്ടായ മാവോയിസ്റ്റ് ആക്രമണത്തിലും 12 സൈനികര്‍ കൊല്ലപ്പെട്ടിരുന്നു. മാവോയിസ്റ്റുകളുടെ പിടിയിലായ സുഖ്മയെ മോചിപ്പിക്കാനായി കൂടുതല്‍ സൈന്യത്തെ സര്‍ക്കാര്‍ വിന്യസിച്ചിരുന്നു.