മിസോറാമില്‍ കോണ്‍ഗ്രസിന് തിരിച്ചടി ; എംഎന്‍എഫിന് മുന്‍തൂക്കം

ന്യൂഡല്‍ഹി : മിസോറാം നിയമസഭാ തെരഞ്ഞെടുപ്പില്‍ കോണ്‍ഗ്രസിന് തിരിച്ചടി. 40 അംഗ നിയമസഭയിലേക്ക് നടന്ന തെരഞ്ഞെടുപ്പില്‍ ഭരണകക്ഷിയായ കോണ്‍ഗ്രസിനേക്കാള്‍ മിസോറാം നാഷണല്‍ ഫ്രണ്ടിന് വ്യക്തമായ മുന്‍തൂക്കം നേടിയതായി ആദ്യഫല സൂചനകള്‍ വ്യക്തമാക്കുന്നു. 

ആകെയുള്ള 40 സീറ്റില്‍ 19 ഇടത്ത് എംഎന്‍എഫ് ലീഡ് ചെയ്യുകയാണ്. പത്തിടത്ത് മാത്രമാണ് കോണ്‍ഗ്രസ് ലീഡ് ചെയ്യുന്നത്. ബിജെപി ഒരു സീറ്റിലും മറ്റുള്ളവര്‍ മൂന്നിടത്തും ലീഡ് ചെയ്യുന്നു.

ബിജെപി, സോറം പീപ്പിള്‍സ് മൂവ്‌മെന്റ് എന്നിവയാണ് മല്‍സ രംഗത്തുള്ള മറ്റ് പാര്‍ട്ടികള്‍. മുഖ്യമന്ത്രി ലാല്‍തന്‍ ഹാവ്‌ല, എംഎന്‍എഫിലെ സോറം താങ്‌വ, ഇസെഡ് എന്‍പിയുടെ ലാല്‍ദുഹോമ എന്നിവരാണ് മല്‍സര രംഗത്തുള്ള പ്രമുഖര്‍. 

വടക്കു കിഴക്കന്‍ സംസ്ഥാനങ്ങളില്‍ കോണ്‍ഗ്രസ് ഭരണത്തിലൂള്ള ഏക സംസ്ഥാനമാണ് മിസോറാം. ഇവിടെ ഭരണം നിലനിര്‍ത്താനുള്ള തീവ്രശ്രമത്തിലായിരുന്നു കോണ്‍ഗ്രസ്.