കയ്യിലില്ലാത്ത സഹകരണ സംഘങ്ങൾ പിടിച്ചെടുക്കാൻ സിപിഎം നീക്കം, ജില്ലാ കമ്മിറ്റികൾക്ക് എംവി ഗോവിന്ദന്റെ കത്ത്

തിരുവനന്തപുരം: കേരളത്തിലെ സഹകരണ മേഖലയിൽ പാർട്ടിയുടെ അപ്രമാദിത്വം നിലനിർത്തുന്നതിനായി, നിലവിൽ തങ്ങളുടെ നിയന്ത്രണത്തിലില്ലാത്ത സഹകരണ സംഘങ്ങൾ കൂടി പിടിച്ചെടുക്കാൻ സിപിഎം സംസ്ഥാന നേതൃത്വത്തിന്റെ നീക്കം. ജൂൺ 26-ന് സിപിഎം സംസ്ഥാന സെക്രട്ടറി എംവി ഗോവിന്ദൻ ഒപ്പിട്ട് പാർട്ടി ജില്ലാ കമ്മിറ്റികൾക്ക് അയച്ച കത്തിലാണ് ഇത് സംബന്ധിച്ച കർശന നിർദേശങ്ങൾ നൽകിയിരിക്കുന്നത്. പാർട്ടിയുടെ സാമ്പത്തികവും രാഷ്ട്രീയവുമായ അടിത്തറയായ സഹകരണ മേഖലയിലെ ആധിപത്യം ഒട്ടും ചോർന്നുപോകാതെ ഊട്ടിയുറപ്പിക്കുക എന്ന ലക്ഷ്യത്തോടെയാണ് ഈ നീക്കം. കത്ത് ലഭിച്ചതിന് പിന്നാലെ വിവിധ ജില്ലകളിൽ സഹകരണ സംഘങ്ങളുടെ പാർട്ടി സബ് കമ്മിറ്റി യോഗങ്ങൾ അടിയന്തരമായി വിളിച്ചുചേർക്കാൻ ആരംഭിച്ചിട്ടുണ്ട്.

കേരള ബാങ്കിന് കീഴിലുള്ള പ്രാഥമിക സഹകരണ സംഘങ്ങൾക്ക് പുറമേയുള്ള മറ്റ് സഹകരണ സംഘങ്ങൾക്ക് നിലവിൽ 'സി' ക്ലാസ് മെമ്പർഷിപ്പാണുള്ളത്. സി-ക്ലാസ് മെമ്പർഷിപ്പുള്ള സംഘങ്ങൾക്ക് നിലവിൽ ഭരണപരമായ വോട്ടവകാശമില്ല. എന്നാൽ, ഭാവിയിൽ യുഡിഎഫ് സർക്കാർ നിയമഭേദഗതിയിലൂടെ സി-ക്ലാസ് സംഘങ്ങൾക്കും വോട്ടവകാശം നൽകാനുള്ള തീരുമാനമെടുത്തേക്കാമെന്ന് സിപിഎം സംസ്ഥാന നേതൃത്വം മുൻകൂട്ടി വിലയിരുത്തുന്നു

സി-ക്ലാസ് സംഘങ്ങൾക്ക് വോട്ടവകാശം ലഭിച്ചാൽ സഹകരണ മേഖലയിലെ പാർട്ടിയുടെ നിലവിലെ ഏകപക്ഷീയമായ മേധാവിത്വത്തിന് അത് വലിയ തിരിച്ചടിയാകുമെന്നാണ് കത്തിലെ പ്രധാന മുന്നറിയിപ്പ്. ഇത് മുൻകൂട്ടി കണ്ടുകൊണ്ട്, നിലവിൽ പാർട്ടിയുടെ കയ്യിലില്ലാത്തതും പ്രതിപക്ഷ സംഘടനകൾ ഭരിക്കുന്നതുമായ സി-ക്ലാസ് സഹകരണ സംഘങ്ങളുടെ ഭരണം എങ്ങനെയെങ്കിലും പിടിച്ചെടുക്കാൻ താഴേത്തട്ടിൽ അടിയന്തര ഇടപെടലുകൾ ഉണ്ടാകണമെന്ന് ജില്ലാ കമ്മിറ്റികൾക്ക് സംസ്ഥാന സെക്രട്ടറി നിർദേശം നൽകിയിട്ടുണ്ട്.

സഹകരണ പ്രസ്ഥാനങ്ങളിലെ സിപിഎമ്മിന്റെ പരമാധികാരം നിലനിർത്തുക എന്നതാണ് ഈ നീക്കത്തിലൂടെ പാർട്ടി ലക്ഷ്യമിടുന്നത്. ഇതിനായി അംഗത്വ വിതരണം ശക്തമാക്കാനും അതാത് സഹകരണ സംഘങ്ങളിലെ വോട്ടർമാരെ സ്വാധീനിക്കാനുമുള്ള കൃത്യമായ കർമ്മപദ്ധതികൾ രൂപീകരിക്കാൻ പ്രാദേശിക ഘടകങ്ങൾക്ക് നിർദേശം നൽകിക്കഴിഞ്ഞു. സംസ്ഥാന സെക്രട്ടറിയുടെ കത്ത് പുറത്തായതോടെ സഹകരണ മേഖല രാഷ്ട്രീയ യുദ്ധഭൂമിയാകുമെന്ന സൂചനയാണ് പുറത്തുവരുന്നത്.