ക്വാര്‍ട്ടേഴ്സില്‍ പാതി കത്തിയ നിലയില്‍ മൃതദേഹം, ഒരാള്‍ പിടിയില്‍

തൃശൂര്‍: തൃശൂരിലെ കുന്നംകുളം ചൊവ്വന്നൂരില്‍ വാടകക്വാര്‍ട്ടേഴ്സില്‍ പാതി കത്തിയ നിലയില്‍ മൃതദേഹം കണ്ടെത്തി. കൊലപാതകമാണെന്നാണ് പ്രാഥമിക നിഗമനം. ചൊവ്വന്നൂര്‍ ബസ് സ്റ്റോപ്പിന് സമീപമുള്ള സെന്‍മേരിസ് ക്വാര്‍ട്ടേഴ്സിലാണ് യുവാവിന്റേത് തോന്നിപ്പിക്കുന്ന മൃതദ്ദേഹം കണ്ടെത്തിയത്. സംഭവത്തില്‍ ചൊവ്വന്നൂര്‍ സ്വദേശി സണ്ണിയെ പൊലീസ് തൃശൂര്‍ നഗരത്തില്‍ നിന്ന് പിടികൂടി. ഇയാളുടെ ക്വാര്‍ട്ടേഴ്സിലാണ് മൃതദേഹം കണ്ടെത്തിയത്.

വൈകീട്ട് അഞ്ചോടെയാണ് മൃതദേഹം കണ്ടത്. മുറിയില്‍ നിന്നും പുക വരുന്നത് കണ്ട ആളുകള്‍ പുറത്തുനിന്ന് പൂട്ടിയ മുറി തുറന്ന് നോക്കുകയായിരുന്നു. മുറി തുറന്നപ്പോള്‍ പാതി കത്തിയ നിലയില്‍ കമിഴ്ന്നു കിടക്കുന്ന രീതിയിലാണ് മൃതദേഹം കണ്ടത്.

മുറിയിലെ താമസക്കാരനായ ചൊവ്വന്നൂര്‍ സ്വദേശിയായ സണ്ണിയെ രാവിലെ മുതല്‍ കാണാതായിരുന്നു. സണ്ണി നേരത്തെ രണ്ടു കൊലപാതക കേസുകളിലെ പ്രതിയാണ്, പരിചയമില്ലാത്ത പലരും ഇയാളുടെ മുറിയില്‍ വരാറുള്ളതായാണ് നാട്ടുകാര്‍ പറയുന്നത്. കുന്നംകുളം എസ് എച്ച് ഒ ജയപ്രദീപിന്റെ നേതൃത്വത്തില്‍ പൊലീസ് എത്തി അന്വേഷണം ആരംഭിച്ചിട്ടുണ്ട്.