കണ്ണൂര്‍: കോണ്‍ഗ്രസിന്റെ സമര സംഗമം പരിപാടിയുടെ പോസ്റ്ററില്‍ മുതിര്‍ന്ന കോണ്‍ഗ്രസ് നേതാവ് കെ സുധാകരനെ ഒഴിവാക്കിയതില്‍ അതൃപ്തി പരസ്യമാക്കി സുധാകരന്‍ അനുകൂലികള്‍. പോസ്റ്ററില്‍ നിന്നും തല ഒഴിവാക്കിയാലും ഹൃദയത്തില്‍ നിന്ന് പറിച്ചെറിയാന്‍ കഴിയില്ലെന്ന് കെ സുധാകരന്റെ സന്തത സഹചാരി ജയന്ത് ദിനേശിന്‍റെ ഫെയ്‌സ്ബുക്ക് പോസ്റ്റ്. രാജ്‌മോഹന്‍ ഉണ്ണിത്താന്റേയും ഷാഫി പറമ്പിലിന്റേയും മറ്റ് നേതാക്കളുടേയും ഫോട്ടോ പോസ്റ്ററിലുണ്ട്.

കെ സുധാകരന്‍ കണ്ണൂരിലെ കോണ്‍ഗ്രസുകാരുടെ മാത്രമല്ല ' കേരളത്തിലെ മുഴുവന്‍ കോണ്‍ഗ്രസുകാരുടെയും ഏറ്റവും പ്രിയപ്പെട്ട നേതാവാണെന്നാണ് ജയന്ത് ദിനേശ് ഫെയ്‌സ്ബുക്കില്‍ കുറിച്ചത്. സുധാകരനൊപ്പമുള്ള ഫോട്ടോയും ഉള്‍പ്പെടുത്തിയാണ് കുറിപ്പ്.

ഫെയ്‌സ്ബുക്ക് കുറിപ്പിന്റെ പൂര്‍ണരൂപം

കെ സുധാകരന്‍ കണ്ണൂരിലെ കോണ്‍ഗ്രസുകാരുടെ മാത്രമല്ല 'കേരളത്തിലെ മുഴുവന്‍ കോണ്‍ഗ്രസുകാരുടെയും ഏറ്റവും പ്രിയപ്പെട്ട നേതാവാണ്.

അദ്ദേഹത്തിന്റെ ജില്ലയില്‍ പാര്‍ട്ടിയുടെ സമരപരിപാടി നടക്കുമ്പോള്‍ പോസ്റ്ററില്‍ ആ തല ഒഴിവാക്കാന്‍ നിങ്ങള്‍ക്ക് കഴിയും. പക്ഷേ, കണ്ണൂരിലെ കോണ്‍ഗ്രസുകാരുടെ ഹൃദയത്തില്‍ നിന്ന് ആ മുഖവും പേരും പറിച്ചെറിയാന്‍ കരുത്തുള്ളവര്‍ ആരും തന്നെ ജനിച്ചിട്ടില്ല.