ഇ ശ്രീധരന്‍ മുഖ്യമന്ത്രിയാകാനും യോഗ്യന്‍, മത്സരിക്കും: കെ സുരേന്ദ്രന്‍

കാസര്‍കോട്‌: തിരഞ്ഞെടുപ്പിൽ ഇ ശ്രീധരൻ സ്ഥാനാർഥിയാകുമെന്ന് ബിജെപി സംസ്ഥാന അധ്യക്ഷൻ കെ സുരേന്ദ്രൻ. മുഖ്യമന്ത്രി പദവി ഉൾപ്പെടെ ഏതുപദവിയും വഹിക്കാൻ യോഗ്യനാണ് അദ്ദേഹമെന്നും സുരേന്ദ്രൻ പറഞ്ഞു.

ഇ ശ്രീധരൻ കേരളത്തിൻറെ മുഖ്യമന്ത്രിയാകണമെന്ന് ആഗ്രഹിക്കുന്നവർ ഏറെയാണ്. താൻ മൽസരിക്കുമോയെന്ന കാര്യത്തിൽ തീരുമാനം എടുക്കേണ്ടത് പാർട്ടിയാണെന്നും സുരേന്ദ്രൻ മനോരമ ന്യൂസിനോട് പറഞ്ഞു.

കേരളത്തിൽ വികസനപ്രതിസന്ധിയുണ്ട്. സർക്കാരിൻറെ പിആർ ജോലികൾ മാത്രമാണ് നടക്കുന്നത്. ശക്തമായ ത്രികോണ മൽസരത്തിലൂടെ 30% വോട്ട് ബിജെപി നേടുമെന്നും സുരേന്ദ്രൻ പറഞ്ഞു. അതിനിടെ, ബിജെപിയുടെ വിജയ യാത്രയ്ക്ക് കാസർകോട്ട് ഇന്ന് തുടക്കമാകും.