രക്ഷിക്കാൻ ഓടിയെത്തിയവർ, ബിജിയെയും രാജേഷിനെയും കാണാനെത്തി യൂസഫലി; കൈ നിറയെ സമ്മാനങ്ങളും 

കൊച്ചി: ഹെലികോപ്റ്റർ അപകടത്തിന്റെ സമയത്ത് രക്ഷാപ്രവര്‍ത്തനത്തിന് മുന്‍കൈ എടുത്തവർക്ക് നന്ദിയറിയിക്കാൻ നേരിട്ടെത്തി എം എ യൂസഫലി. കുമ്പളം സ്വദേശി എ വി ബിജിയെയും രാജേഷിനെയും കാണാനാണ് അദ്ദേഹം എത്തിയത്. ഇവർക്ക് കൈനിറയെ സമ്മാനങ്ങളും നൽകി. കുടുംബത്തിനൊപ്പം അല്‍പ്പസമയം ചിലവഴിച്ച ശേഷമാണ് അദ്ദേഹം മടങ്ങിയത്. 

ഏപ്രില്‍ 11ന് കടവന്ത്രയിലെ വീട്ടിൽ നിന്ന് ലേക്ക്ഷോർ ആശുപത്രിയിലേക്ക് പോവുന്നതിനിടെയാണ് ലുലു ഗ്രൂപ്പ് ചെയർമാൻ എം എ യൂസഫലിയും കുടുംബവും സഞ്ചരിച്ച ഹെലികോപ്റ്റര്‍ അപകടത്തില്‍പ്പെട്ടത്. യൂസഫലിയും ഭാര്യയും മൂന്ന് ജീവനക്കാരും അടക്കം ആറുപേരായിരുന്നു ഹെലികോപ്റ്ററിലുണ്ടായിരുന്നത്.  ആശുപത്രിയിലെത്തിക്കും മുമ്പ് പ്രാഥമിക ശുശ്രൂഷ നല്‍കിയത് ബിജിയായിരുന്നു. വനിതാ പൊലീസ് ഓഫീസര്‍ കൂടിയാണ് ബിജി. ബിജിയും രാജേഷും ചെയ്തത് വലിയ സഹായമായിരുന്നുവെന്നും യൂസഫലി പറഞ്ഞു.