കോഴിക്കോട്: മഹാമാഘ മഹോത്സവവുമായി ബന്ധപ്പെട്ട തർക്കം രൂക്ഷമാകുന്നു. മഹാമണ്ഡലേശ്വർ സ്വാമി ആനന്ദവനം ഭാരതി മഹാരാജിനെതിരെ ഗുരുതര ആരോപണങ്ങളുമായി മാർഗദർശക മണ്ഡലം രംഗത്തെത്തി. ഏകപക്ഷീയ തീരുമാനങ്ങളിലൂടെ ഉത്സവത്തിന്റെ ആദ്യകാല സംഘാടകരെ മാറ്റിനിർത്തിയെന്നും വരുമാനത്തിൽ ക്രമക്കേട് നടത്തിയെന്നും ആരോപിച്ച ആത്മീയ സംഘടന, ആനന്ദവനവുമായി സഹകരിക്കാതെ അടുത്ത ഉത്സവത്തിനുള്ള ഒരുക്കങ്ങളുമായി മുന്നോട്ടുപോകുകയാണ്. ജുന അഖാഡയുടെ നേതൃത്വത്തിൽ പ്രത്യേക മഹോത്സവം നടത്താനാണ് ആനന്ദവനം വിഭാഗത്തിന്റെ നീക്കം.

മാർഗദർശക മണ്ഡലം പ്രസിഡന്റ് സ്വാമി ചിദാനന്ദപുരിയും ജനറൽ സെക്രട്ടറി സ്വാമി സത്സ്വരൂപാനന്ദ സരസ്വതിയും പുറത്തിറക്കിയ പ്രസ്താവനയിലാണ് ആരോപണങ്ങൾ. 2026ലെ മഹാമാഘ മഹോത്സവം വിപുലമാക്കുന്നതിൽ ആനന്ദവനത്തിന്റെ പങ്ക് നിർണായകമായിരുന്നുവെന്ന് സമ്മതിച്ച മണ്ഡലം, പിന്നീട് ആദ്യകാല സംഘാടകരെ അവഗണിച്ചെന്നാണ് ആരോപിച്ചത്. 2025ൽ ജുന അഖാഡയുടെ നേതൃത്വത്തിലാണ് ഉത്സവം ആരംഭിച്ചതെന്ന പ്രതീതി സൃഷ്ടിക്കാനുള്ള ശ്രമങ്ങളെയും അടുത്ത മഹോത്സവം 51 ദിവസം നീളുമെന്ന് ഏകപക്ഷീയമായി പ്രഖ്യാപിച്ചതിനെയും പ്രസ്താവന ചോദ്യം ചെയ്തു.

ഉത്സവത്തിലൂടെ ലഭിച്ച വരുമാനത്തിന്റെ ഗണ്യമായൊരു ഭാഗം സംഘാടക സമിതിയുടെ അറിവോ സമ്മതമോ കൂടാതെ ആനന്ദവനവും അനുയായികളും കൈക്കലാക്കിയെന്നാണ് മണ്ഡലത്തിന്റെ മറ്റൊരു ആരോപണം. അതേസമയം, ഉത്സവത്തിന്റെ ചെലവുകളും ബാധ്യതകളും വഹിക്കേണ്ടിവന്നത് സംഘാടക സമിതിക്കാണെന്നും പ്രസ്താവനയിൽ പറയുന്നു. ആരോപണങ്ങൾ സ്വതന്ത്രമായി സ്ഥിരീകരിച്ചിട്ടില്ല.

തർക്കം പരിഹരിക്കാൻ നടത്തിയ ചർച്ചകൾ പരാജയപ്പെട്ടതായും മണ്ഡലം വ്യക്തമാക്കി. മറ്റുള്ളവർ സഹകരിച്ചാലും ഇല്ലെങ്കിലും ജുന അഖാഡയുടെ കീഴിൽ 'കേരള കുംഭമേള' നടത്തുമെന്ന നിലപാടിൽ ആനന്ദവനം ഉറച്ചുനിന്നതോടെയാണ് ചർച്ചകൾ വഴിമുട്ടിയതെന്ന് പ്രസ്താവനയിൽ പറയുന്നു.

സന്യാസി സമൂഹത്തിന്റെ പാരമ്പര്യങ്ങൾക്ക് വിരുദ്ധമായ സമീപനമാണ് ആനന്ദവനത്തിന്റേതെന്നും മുതിർന്ന ആത്മീയ നേതാക്കൾക്ക് അർഹമായ പരിഗണന നൽകിയില്ലെന്നും മണ്ഡലം ആരോപിച്ചു. സമൂഹത്തിൽ ഭിന്നതയുണ്ടാകാതിരിക്കാനാണ് നേരത്തേ ഉയർന്ന പരാതികൾ പരസ്യമാക്കാതിരുന്നതെന്നും വ്യക്തമാക്കി.

മഹാമാഘ മഹോത്സവത്തെ കേരള കുംഭമേളയെന്ന് വിശേഷിപ്പിക്കരുതെന്നും തനതായ കേരളീയ ആചാരങ്ങളും പാരമ്പര്യങ്ങളുമുള്ള ഉത്സവമാണിതെന്നും മാർഗദർശക മണ്ഡലം പ്രസിഡന്റ് സ്വാമി ചിദാനന്ദപുരി ടിഎൻഐഇയോട് പറഞ്ഞു.

“ചരിത്രകാരൻ ദിനേശ് തിരൂർ 2015ലാണ് മഹാമാഘ മഹോത്സവം പുനരുജ്ജീവിപ്പിച്ചത്. കഴിഞ്ഞ പത്തുവർഷമായി പരമ്പരാഗത ആചാരങ്ങൾ പിന്തുടർന്ന് തിരുനാവായയിൽ ചെറിയ തോതിൽ ഉത്സവം നടന്നുവരികയായിരുന്നു. ആനന്ദവനത്തിന്റെ ഇടപെടൽ ഉത്സവം വിപുലമാക്കാൻ സഹായിച്ചു. എന്നാൽ അദ്ദേഹവും സംഘാടക സമിതിയും തമ്മിൽ അഭിപ്രായവ്യത്യാസങ്ങളുണ്ടായതോടെ മുഖ്യരക്ഷാധികാരി സ്ഥാനത്തുനിന്ന് നീക്കാൻ തീരുമാനിക്കുകയായിരുന്നു,” അദ്ദേഹം പറഞ്ഞു.

വാരാണസിയിലെ കുംഭമേളയുടെ മാതൃകയിൽ ഉത്സവം പരിഷ്കരിച്ചതും ഗംഗാ ആരതിയുടെ മാതൃകയിൽ നിളാ ആരതി അവതരിപ്പിച്ചതും കേരളീയ സ്വത്വം നഷ്ടപ്പെടുത്തുന്ന നടപടിയാണെന്ന വിമർശനത്തിന് വഴിവെച്ചിരുന്നു.

“കേരള കുംഭമേള എന്ന വിശേഷണം ശരിയല്ല. കുംഭമേള എന്നു വിളിക്കാം. ഇക്കുറി കേരളത്തിന്റെ ആചാരങ്ങൾക്കും അനുഷ്ഠാനങ്ങൾക്കും കൂടുതൽ പ്രാധാന്യം നൽകാനാണ് തീരുമാനം,” ചിദാനന്ദപുരി പറഞ്ഞു.

ചർച്ചകൾ പരാജയപ്പെട്ടതോടെ തിരുനാവായയിലെയും തവനൂരിലെയും സംഘാടക സമിതി പ്രതിനിധികളെ മണ്ഡലം ഒരുമിച്ചിരുത്തി. ഏകീകൃത സംവിധാനത്തിൽ പ്രവർത്തിക്കാനും ചാർട്ടേഡ് അക്കൗണ്ടന്റിനെക്കൊണ്ട് കണക്കുകൾ ഓഡിറ്റ് ചെയ്യിക്കാനും ധാരണയായി. നിബന്ധനകൾ അന്തിമമാക്കിയശേഷം നേതൃത്വപരമായ പങ്ക് ഏറ്റെടുക്കുന്നത് പരിഗണിക്കുമെന്നും മണ്ഡലം അറിയിച്ചു.

അഷ്ടമംഗല ദേവപ്രശ്നത്തിനു പിന്നാലെ ഔദ്യോഗിക സംഘാടക സമിതി 2027 ജനുവരി 15 മുതൽ മാർച്ച് ആറുവരെ മഹോത്സവം നടത്താൻ തീരുമാനിച്ചിട്ടുണ്ട്. എന്നാൽ, ജുന അഖാഡയ്ക്കും തിരുനാവായ ദേവസ്വത്തിനും അഖാഡയുടെ നേതൃത്വത്തിൽ നടക്കുന്ന ഉത്സവത്തിനും ദേവപ്രശ്നവുമായി ബന്ധമില്ലെന്നാണ് ആനന്ദവനം വിഭാഗത്തിന്റെ നിലപാട്.

ജുന അഖാഡയുടെ കീഴിലുള്ള 2026ലെ മഹാമാഘ മഹോത്സവ സംഘാടക സമിതി ചീഫ് കോ-ഓർഡിനേറ്റർ കെ. കേശവദാസ് നവംബർ ഏഴിന് തിരുനാവായയിൽ പ്രത്യേക സംഘാടക സമിതി രൂപീകരിക്കുന്നതിനായി യോഗം ചേരുമെന്ന് അറിയിച്ചു. സംഭവവികാസങ്ങളിൽ നവരാത്രിക്കുശേഷം ഔദ്യോഗിക പ്രസ്താവന ഇറക്കുമെന്ന് ആനന്ദവനം ടിഎൻഐഇയോട് പറഞ്ഞു.