തിരുവനന്തപുരം: നിയമസഭ തെരഞ്ഞെടുപ്പില്‍ മത്സരിച്ചേക്കുമെന്ന് ശശി തരൂര്‍ സൂചന നല്‍കിയതില്‍ പ്രതികരണവുമായി പ്രതിപക്ഷ നേതാവ് വി ഡി സതീശന്‍. സ്വയം സ്ഥാനാര്‍ഥിത്വം ആരും പ്രഖ്യാപിക്കേണ്ടതില്ലെന്നും ഇത്തരം കാര്യങ്ങളില്‍ തീരുമാനമെടുക്കേണ്ടത് പാര്‍ട്ടി നേതൃത്വമാണെന്നും സതീശന്‍ പറഞ്ഞു. തെരഞ്ഞെടുപ്പില്‍ മത്സരിപ്പിക്കണോ എന്നും ആര് എവിടെ മത്സരിക്കണമെന്നും തീരുമാനിക്കുന്നത് പാര്‍ട്ടിയാണ്. സ്വന്തം നിലയ്ക്ക് ആര്‍ക്കും തീരുമാനമെടുക്കാനാകില്ലെന്നും അഭിപ്രായമുള്ളവര്‍ പാര്‍ട്ടിയെ അറിയിക്കട്ടെയെന്നും വിഡി സതീശന്‍ പറഞ്ഞു.

സ്ഥാനാര്‍ഥിത്വം സംഘടനാപരമായി പാര്‍ട്ടിയെടുക്കേണ്ട തീരുമാനമാണ്. സ്വന്തമായി തീരുമാനമെടുക്കുന്നത് ശരിയായ നടപടിയല്ല. പാര്‍ട്ടിയില്‍ ചര്‍ച്ച ചെയ്ത് പാര്‍ട്ടിയ്ക്കു വിധേയരായാണ് തീരുമാനങ്ങള്‍ എടുക്കേണ്ടത്. സ്വയം സ്ഥാനാര്‍ഥിത്വം പ്രഖ്യാപിക്കേണ്ട.- സതീശന്‍ കൂട്ടിച്ചേര്‍ത്തു.
ശശി തരൂര്‍ കേരള രാഷ്ട്രീയത്തിലുണ്ട്. തലസ്ഥാനത്ത് നിന്നുളള എംപിയാണ്. ഇതൊന്നും വിവാദമാക്കേണ്ട കാര്യമില്ലെന്നും അദ്ദേഹം പറഞ്ഞു. 

'ഏത് കോണ്‍ഗ്രസ് നേതാവിനെ പറ്റി ആര് നല്ലതു പറഞ്ഞാലുംം സന്തോഷമാണ്. പൊതുസമൂഹത്തില്‍ ഉള്ളൊരാള്‍ ഒരു കോണ്‍ഗ്രസ് നേതാവിനെ പറ്റി നല്ലതുപറഞ്ഞാല്‍ ഞങ്ങള്‍ സന്തോഷിക്കുകയല്ലേ വേണ്ടത്' എന്ന് എന്‍എസ്എസ് ജനറല്‍ സെക്രട്ടറി ജി സുകുമാരന്‍ നായരുടെ ശശി തരൂരിനെ പുകഴ്ത്തിയുള്ള പ്രസ്താവനയെ കുറിച്ചുള്ള ചോദ്യത്തിന് അദ്ദേഹം മറുപടി നല്‍തി. 

കേരളത്തില്‍ ഇനി മുതല്‍ സജീവമായുണ്ടാകുമെന്നും നിയമസഭാ തെരഞ്ഞെടുപ്പില്‍ മത്സരിക്കാന്‍ താത്പര്യമുണ്ടൈന്നും തരൂര്‍ കഴിഞ്ഞ ദിവസം വ്യക്തമാക്കിയിരുന്നു. ഇതിന് പിന്നാലെ, ഇനി ലോക്‌സഭയിലേക്ക് മത്സരിക്കാനില്ലെന്ന് വ്യക്തമാക്കി ടി എന്‍ പ്രതാപനും രംഗത്തെത്തി. 

ഈ വാര്‍ത്ത കൂടി വായിക്കൂ 1500 ചതുരശ്രഅടി വരെയുള്ള നിര്‍മ്മാണങ്ങള്‍ ക്രമപ്പെടുത്തും;  വലിയ കെട്ടിടങ്ങള്‍ക്ക് ഉയര്‍ന്ന ഫീസ്; നിയമഭേദഗതി ഈ സമ്മേളനത്തില്‍ തന്നെ

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ