'തിരക്കിയപ്പോൾ അങ്ങനെ ഒരാളില്ല'; ഭാവിവരനെ ഞെട്ടിക്കാൻ പോയ യുവതി മടങ്ങിയത് ഇരട്ടി ഞെട്ടലോടെ

കൊച്ചി: ഭാവിവരനെ ഞെട്ടിക്കാൻ പോയ യുവതി വീട്ടിലേക്ക് മടങ്ങിയത് ഇരട്ടി ഞെട്ടലോടെ. എറണാകുളം കലക്ടറേറ്റിൽ റവന്യൂ വകുപ്പിൽ ജോലി ചെയ്യുന്നു എന്നാണ് യുവാവ് പറഞ്ഞിരുന്നത്. എന്നാൽ അവിടെയെത്തി ആളെ തിരക്കിയപ്പോൾ അങ്ങനെയൊരാൾ ഇവിടെ ജോലി ചെയ്യുന്നില്ലെന്ന മറുപടിയാണ് കിട്ടിയത്. 

30 കാരിയായ മലപ്പുറം സ്വദേശിനിയാണ് ഭാവിവരനെ തേടി എറണാകുളം കലക്ടറേറ്റിൽ എത്തിയത്. ഇരുവരുടെയും പുനർ വിവാഹമാണ്. മാട്രിമോണിയൽ സൈറ്റ് വഴിയാണ് യുവതി ഇയാളെ പരിചയപ്പെടുന്നത്. ഭാര്യ മരിച്ചുപോയെന്നും കലക്ടറേറ്റിലാണ് ജോലിയെന്നും ഇയാൾ പറഞ്ഞിരുന്നു. 

എടത്തല സ്വദേശിയായ യുവാവുമായി വിവാഹം നിശ്ചയിച്ചതിന് പിന്നാലെയാണ് യുവതി ഇയാളെ നേരിൽ കാണാൻ എത്തിയത്. പക്ഷേ കലക്ടറേറ്റിലെ മജിസ്റ്റീരിയൽ സെക്ഷനിലെ ജീവനക്കാരോട് ആളെ തിരക്കിയപ്പോൾ ഇങ്ങനെയൊരാൾ റവന്യൂ വകുപ്പിൽ ജോലി ചെയ്യുന്നില്ലെന്ന് അവർ ഉറപ്പിച്ചു പറഞ്ഞു. മറ്റ് ഓഫീസുകളിലും അന്വേഷിച്ചെങ്കിലും ഇങ്ങനെയൊരാൾ ഇല്ലെന്ന് തന്നെയായിരുന്നു മറുപടി. ഇതോടെ ചതിക്കപ്പെട്ടെന്നു മനസിലായി. എങ്കിലും വലിയ അപകടത്തിൽ നിന്ന് രക്ഷപ്പെട്ടെന്ന ആശ്വാസത്തിൽ യുവതി മടങ്ങി.
 

ഈ വാര്‍ത്ത കൂടി വായിക്കൂ 

ഡോക്ടര്‍മാരുടെ സംസ്ഥാന വ്യാപക പണിമുടക്ക് ഇന്നും; രാവിലെ പത്തരയ്ക്ക് മുഖ്യമന്ത്രിയുമായി ചര്‍ച്ച

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ