പൊന്നാനി കടപ്പുറത്ത് യുവാവിന് ആള്‍ക്കൂട്ട മര്‍ദനം, അന്വേഷണം

മലപ്പുറം: പൊന്നാനിയില്‍ യുവാവിന് ആള്‍ക്കൂട്ട മര്‍ദ്ദനം. പൊന്നാനി പടിഞ്ഞാറേക്കര സ്വദേശി പ്രവീണിനെയാണ് ഒരു സംഘം ക്രൂരമായി മര്‍ദിച്ചത്. പൊന്നാനി കടപ്പുറത്ത് വച്ചാണ് പ്രവീണിന് മര്‍ദ്ദനമേറ്റത്. മര്‍ദനത്തിന്റെ ദൃശ്യങ്ങള്‍ വ്യാപകമായി സമൂഹമാധ്യമങ്ങളില്‍ പ്രചരിക്കുന്നുണ്ട്.

പ്രവീണും കടപ്പുറത്തെ ചില മത്സ്യതൊഴിലാളികളുമായി സിനിമാ തിയ്യറ്ററില്‍ വച്ചുണ്ടായ തര്‍ക്കത്തിന്റെ തുടര്‍ച്ചയാണ് മര്‍ദ്ദനമെന്നാണ് പൊലീസിനു കിട്ടിയിട്ടുള്ള സൂചന. പ്രവീണ്‍ ഇതുവരെ പൊലീസില്‍ പരാതി നല്‍കിയിട്ടില്ല. സമൂഹ മാധ്യമങ്ങളില്‍ പ്രചരിക്കുന്ന ദൃശ്യത്തിന്റെ അടിസ്ഥാനത്തില്‍ പൊലീസ് അന്വേഷണം തുടങ്ങിയിട്ടുണ്ട്.