വൈക്കത്ത് ബിജെപി ഹർത്താൽ തുടങ്ങി

കോട്ടയം : ആർഎസ്എസ് കാര്യാലയത്തിന് നേർക്കുണ്ടായ ആക്രമണത്തിൽ പ്രതിഷേധിച്ച് വൈക്കത്ത് ഇന്ന് ബിജെപി ഹർത്താൽ ആചരിക്കുന്നു. വൈക്കം താലൂക്കിലാണ് ഹർത്താൽ.  രാവിലെ ആറു മുതൽ വൈകീട്ട് ആറുവരെയാണ് ഹർത്താൽ. ശബരിമല വിഷയത്തിൽ ഫേസ്ബുക്ക് പോസ്​റ്റിട്ട യുവതിയെ മർദിച്ചതിന്റെ തുടർച്ചയായിട്ടായിരുന്നു ആക്രമണം. 

ശബരിമല യുവതി പ്രവേശത്തിന് അനുകൂലമായി സമൂഹമാധ്യമത്തിൽ കുറിപ്പിട്ട വിദ്യാർഥിനിക്കു പിന്തുണയായി ചൊവ്വാഴ്ച വൈകിട്ട് സിപിഎം സമ്മേളനം നടത്തി. സമ്മേളന ശേഷം പെൺകുട്ടിയെ മർദിച്ച യുവാവിന്റെ വീട്ടിലേക്കു ജാഥ നടത്തി. തിരികെ വരുമ്പോഴാണ് സിപിഎം, ആർഎസ്എസ് പ്രവർത്തകർ ഏറ്റുമുട്ടിയത്. 

രാത്രിയോടെ വൈക്കം മഹാദേവക്ഷേത്രത്തിനു സമീപത്തെ ആർ.എസ്.എസ് കാര്യാലയത്തിനു നേരെ ബൈക്കിലെത്തിയവർ കല്ലെറിയുകയായിരുന്നു. ഈ സമയം കാര്യാലയത്തിനുള്ളിൽ ഉണ്ടായിരുന്ന ജില്ല സഹകാര്യവാഹ് സോമശേഖരൻ, താലൂക്ക് കാര്യവാഹക് മനു നാരായണൻ കുട്ടി എന്നിവർക്ക് പരിക്കേറ്റു.  ഇവരെ വൈക്കം താലൂക്ക് ആശുപത്രിയിൽ പ്രവേശിപ്പിച്ചു. സംഭവമറിഞ്ഞ് പ്രദേശത്ത് നൂറുകണക്കിനു പ്രവർത്തകർ തടിച്ചുകൂടിയത് സംഘർഷാവസ്ഥ സൃഷ്​ടിച്ചിരുന്നു.