കാറിന് മുകളിലേക്ക് ആകാശത്ത് നിന്ന് ഭീമാകാരമായ ഐസ് കട്ട; തലനാരിഴയ്ക്ക് രക്ഷപ്പെട്ട് ദമ്പതികള്‍- വൈറല്‍ വീഡിയോ 

മോസ്‌കോ: റഷ്യയില്‍ കാറിന് മുകളില്‍ വീണ ഐസ് കട്ടയില്‍ നിന്ന്‌ ദമ്പതികള്‍ തലനാരിഴയ്ക്ക് രക്ഷപ്പെട്ടു. കാറില്‍ ഇരിക്കുന്ന സമയത്താണ് വിന്‍ഡ് ഷീല്‍ഡില്‍ ഐസ് കട്ട വീണത്. തൊട്ടരികിലുള്ള കെട്ടിടത്തിന്റെ മുകളില്‍ നിന്നാണ് ഭീമാകാരമായ ഐസ് കട്ട വീണത്.

കോളയിലെ ആര്‍ട്ടിക് ഔട്ട്‌പോസ്റ്റിന് അരികില്‍ പാര്‍ക്ക് ചെയ്തിരുന്ന കാറിന് മുകളില്‍ ഐസ് കട്ട വീഴുന്ന വീഡിയോ വ്യാപകമായാണ് പ്രചരിക്കുന്നത്. ഒരാള്‍ കാറില്‍ ഇരിക്കുന്നുണ്ട്. രണ്ടാമത്തെയാള്‍ കാറിന്റെ ഡോര്‍ തുറന്ന് അകത്തു കയറുന്നതാണ് വീഡിയോയുടെ തുടക്കത്തില്‍. നിമിഷങ്ങള്‍ക്കകം കാറിന്റെ വിന്‍ഡ് ഷീല്‍ഡിലേക്ക് മുകളില്‍ നിന്ന് ഐസ് കട്ട വീഴുന്നതാണ് രണ്ടാമത്തെ രംഗം. വീഴ്ചയുടെ ആഘാതത്തില്‍ കാറിന്റെ ചില്ല് തകര്‍ന്നു. തൊട്ടടുത്തുള്ള കെട്ടിടത്തിന്റെ 50 അടി മുകളില്‍ നിന്നാണ് ഐസ് കട്ട വീണത്.

സംഭവം നടക്കുന്ന സമയത്ത് കാര്‍ റിവേഴ്‌സിലായിരുന്നു. ഐസ് കട്ട വീണ ഉടനെ ദമ്പതികള്‍ കാറില്‍ നിന്ന് ചാടി പുറത്തേയ്്ക്ക് വന്നു. ഭാഗ്യം കൊണ്ട് ഇരുവര്‍ക്കും പരിക്ക് പറ്റിയില്ല. അല്ലാത്തപക്ഷം അത്യാഹിതം സംഭവിച്ചേനെയെന്നാണ് കമന്റുകള്‍.