ചരിത്ര നീക്കം; ഇസ്രയേൽ യാത്രാ വിമാനം ആദ്യമായി യുഎഇയിൽ 

അബുദാബി: ചരിത്രത്തിൽ ആദ്യമായി ഇസ്രയേൽ യാത്രാ വിമാനം യുഎഇയിൽ എത്തി. ഇസ്രയേൽ– യുഎഇ സമാധാന കരാറിന് പിന്നാലെയാണ് ആദ്യ യാത്രാ വിമാനം അബുദാബിയിലെത്തിയത്. ഇരു രാജ്യങ്ങളും തമ്മിൽ നയതന്ത്ര ബന്ധം തുടങ്ങാൻ തീരുമാനിച്ചതിൻറെ പശ്ചാത്തലത്തിലാണ് യാത്രാ വിമാനം യുഎഇയിലെത്തുന്നത്. 

സൗദി അറേബ്യയുടെ  വ്യോമ മേഖലയിലൂടെയായിരുന്നു എൽവൈ 971 നമ്പർ വിമാനത്തിന്റെ യാത്ര. ഇതാദ്യമായാണ് സൗദിയുടെ വ്യോമ മേഖലയിലൂടെ ഇസ്രയേൽ വിമാനം പറക്കുന്നത്. യുഎസ് പ്രസിഡന്റ് ഡൊണാൾഡ് ട്രംപിന്റെ മരുമകനും മുഖ്യ ഉപദേശകനുമായ ജാറെദ് കുഷ്ണർ അടക്കമുള്ള യുഎസ് ഉദ്യോഗസ്ഥരും ഇസ്രയേൽ പ്രതിനിധികളുമടക്കമുള്ളവരാണ് യാത്രക്കാർ.   

നിക്ഷേപം, സാമ്പത്തികം, ആരോഗ്യം, ബഹിരാകാശം, വ്യോമയാനം, വിദേശ നയം, നയതന്ത്രം, ടൂറിസം, സാംസ്‍കാരികം തുടങ്ങിയ മേഖലകളിൽ നിന്നെല്ലാമുള്ള പ്രതിനിധികൾ യുഎഇയിലെത്തിലെത്തിയിട്ടുണ്ട്. ഇവർ ഈ രംഗങ്ങളിലെ സഹകരണം സംബന്ധിച്ച് യുഎഇയിലെ വിവിധ ഏജൻസികളുമായി ചർച്ച നടത്തും. വിവിധ രംഗങ്ങളിൽ സഹകരിച്ചും ഒത്തൊരുമിച്ചും മുന്നോട്ട് പോകുന്നതിനുള്ള പദ്ധതികൾ ഈ ചർച്ചകളിൽ രൂപം കൊള്ളുമെന്നാണ് റിപ്പോർട്ടുകൾ. 

ഹീബ്രു, അറബിക്, ഇം​ഗ്ലീഷ് ഭാഷകളിൽ സമാധാനം എന്ന് രേഖപ്പെടുത്തിയ വിമാനം നാളെ അബുദാബിയിൽ നിന്ന് ഇസ്രയേലിലേക്ക് മടങ്ങും. തുടർന്ന് ഇരു രാജ്യങ്ങളുടേയും വ്യോമയാന മന്ത്രാലയങ്ങളുടെ ചർച്ചയുടെ അടിസ്ഥാനത്തിൽ നേരിട്ടുള്ള വിമാന സർവീസുകൾ ആരംഭിക്കും.