ഏകദിനം മതിയാക്കി ഓസീസ് ക്യാപ്റ്റന്‍ ആരോണ്‍ ഫിഞ്ച്; നാളെ അവസാന മത്സരം 

മെല്‍ബണ്‍: ഏകദിന ക്രിക്കറ്റില്‍ നിന്നും വിരമിക്കല്‍ പ്രഖ്യാപിച്ച് ഓസ്‌ട്രേലിയയുടെ വൈറ്റ് ബോള്‍ ക്യാപ്റ്റന്‍ ആരോണ്‍ ഫിഞ്ച്. ന്യൂസിലന്‍ഡിന് എതിരായ ഏകദിന പരമ്പരയിലെ സെപ്തംബര്‍ 11ന് നടക്കുന്ന മത്സരം ഫിഞ്ചിന്റെ അവസാനത്തേതാവും. 

ഏകദിനത്തില്‍ നിന്ന് ഫിഞ്ച് വിരമിക്കല്‍ പ്രഖ്യാപിക്കുന്നതോടെ അടുത്ത വര്‍ഷം ഇന്ത്യ ആതിഥേയത്വം വഹിക്കുന്ന ലോകകപ്പില്‍ പുതിയ ക്യാപ്റ്റനാവും ഓസ്‌ട്രേലിയയെ നയിക്കുക. എന്നാല്‍ ഈ വര്‍ഷം ഓസ്‌ട്രേലിയ വേദിയൊരുക്കുന്ന ട്വന്റി20 ലോകകപ്പില്‍ ഫിഞ്ച് ഓസ്‌ട്രേലിയയെ നയിക്കും. 

ഏകദിനത്തില്‍ ഫോം കണ്ടെത്താന്‍ പ്രയാസപ്പെടുന്ന ഫിഞ്ചിനെയാണ് കഴിഞ്ഞ മത്സരങ്ങളിലായി കണ്ടത്. കഴിഞ്ഞ 7 ഇന്നിങ്‌സില്‍ നിന്ന് 26 റണ്‍സ് മാത്രമാണ് ഏകദിനത്തില്‍ 35കാരനായ ഫിഞ്ച് കണ്ടെത്തിയത്. അടുത്ത ഏകദിന ലോകകപ്പിലേക്കായി ടീമിനെ ഒരുക്കുന്നതിന് പുതിയ ക്യാപ്റ്റന് വേണ്ട സമയം വേണം എന്നതിനാലാണ് താന്‍ ഇപ്പോള്‍ വിരമിക്കല്‍ പ്രഖ്യാപിക്കുന്നത് എന്ന് ഫിഞ്ച് പറഞ്ഞു. 

145 ഏകദിനങ്ങളാണ് ഫിഞ്ച് ഓസ്‌ട്രേലിയക്കായി കളിച്ചത്. നേടിയത് 5401 റണ്‍സ്. ബാറ്റിങ് ശരാശരി 39.1. 54 ഏകദിനങ്ങളില്‍ ഫിഞ്ച് ഓസ്‌ട്രേലിയയെ നയിച്ചു. 30 എണ്ണത്തില്‍ ടീമിനെ ജയത്തിലേക്ക് എത്തിച്ചപ്പോള്‍ 24 മത്സരങ്ങളില്‍ തോല്‍വിയിലേക്ക് വീണു. ക്യാപ്റ്റന്‍ സ്ഥാനത്ത് നിന്ന് 2100 ഏകദിന റണ്‍സ് ആണ് ഫിഞ്ച് നേടിയത്.

ഈ വാര്‍ത്ത കൂടി വായിക്കൂ

7 മത്സരം, ഗോള്‍ 0; സ്റ്റാര്‍ട്ടിങ് 11ല്‍ വന്ന രണ്ട് കളിയിലും റെഡ് ഡെവിള്‍സിന് തോല്‍വി; താളം നഷ്ടപ്പെട്ട് ക്രിസ്റ്റ്യാനോ

സമകാലിക മലയാളം ഇപ്പോള്‍ വാട്ട്‌സ്ആപ്പിലും ലഭ്യമാണ്‌. ഏറ്റവും പുതിയ വാര്‍ത്തകള്‍ അറിയാന്‍ ക്ലിക്ക് ചെയ്യൂ