ആന്‍ഫീല്‍ഡ്: കുഞ്ഞിന്റെ വിയോഗത്തെ തുടര്‍ന്ന് പ്രീമിയര്‍ ലീഗിലെ ലിവര്‍പൂളിന് എതിരായ കളിയില്‍ മാഞ്ചസ്റ്റര്‍ യുനൈറ്റഡിന്റെ സൂപ്പര്‍ താരം ക്രിസ്റ്റ്യാനോ റൊണാള്‍ഡോ പന്ത് തട്ടാന്‍ ഇറങ്ങിയില്ല. എന്നാല്‍ ഏവരുടേയും ഹൃദയം തൊടുന്ന നീക്കമാണ് ആന്‍ഫീല്‍ഡില്‍ ലിവര്‍പൂള്‍ ആരാധകരില്‍ നിന്നുണ്ടായത്. 

കുഞ്ഞിന്റെ വിയോഗത്തില്‍ നീറുന്ന ക്രിസ്റ്റിയാനോയ്ക്ക് വേണ്ടി കളിയുടെ ഏഴാം മിനിറ്റില്‍ ആന്‍ഫീല്‍ഡ് നിര്‍ത്താതെ കയ്യടിച്ചു. ഒരു മിനിറ്റ് കയ്യടി തുടര്‍ന്നു. ഗ്രൗണ്ടില്‍ താരങ്ങള്‍ കളി തുടര്‍ന്നെങ്കിലും ഗ്യാലറിയില്‍ ആരാധകര്‍ യു വില്‍ നെവര്‍ വാല്‍ക്ക് എലോണ്‍ എന്ന പാട്ട് പാടി കയ്യടി തുടര്‍ന്നു.

കറുത്ത ആം ബാന്‍ഡ് അണിഞ്ഞ് മാഞ്ചസ്റ്റര്‍ യുനൈറ്റഡ് താരങ്ങള്‍

കറുത്ത ആം ബാന്‍ഡ് ധരിച്ചാണ് മാഞ്ചസ്റ്റര്‍ യുനൈറ്റഡ് താരങ്ങള്‍ കളിക്കാനിറങ്ങിയത്. ചൊവ്വാഴ്ചയാണ് തന്റെ ഇരട്ട കുട്ടികളില്‍ ഒരാളുടെ മരണ വാര്‍ത്ത ക്രിസ്റ്റ്യാനോ ആരാധകരുമായി പങ്കുവെച്ചത്. ആണ്‍കുഞ്ഞാണ് മരിച്ചത്. 

കളിയിലേക്ക് വന്നാല്‍ 4-0ന് മാഞ്ചസ്റ്റര്‍ യുനൈറ്റഡ് തോല്‍വിയിലേക്ക് കൂപ്പുകുത്തി. 5ാം മിനിറ്റില്‍ ലൂയിസ് ഡയസ്, 22,85 മിനിറ്റുകളില്‍ മുഹമ്മദ് സല, 68ാം മിനിറ്റില്‍ മാനെ എന്നിവരാണ് ലിവര്‍പൂളിനായി വല കുലുക്കിയത്. ജയത്തോടെ ലിവര്‍പൂള്‍ പോയിന്റ് പട്ടികയില്‍ ഒന്നാം സ്ഥാനം പിടിച്ചു. മാഞ്ചസ്റ്റര്‍ യുനൈറ്റഡ് ആറാം സ്ഥാനത്തേക്കും വീണു.

ഈ വാർത്ത കൂടി വായിക്കൂ

വെങ്കടേഷിനോട് ചൂടായി, പിന്നാലെ മക്കല്ലത്തോട് കയർത്തു; അത്ര കൂളല്ല ശ്രേയസ് (വീഡിയോ)

സമകാലിക മലയാളം ഇപ്പോള്‍ വാട്ട്‌സ്ആപ്പിലും ലഭ്യമാണ്.

ഏറ്റവും പുതിയ വാര്‍ത്തകള്‍ അറിയാന്‍ ക്ലിക്ക് ചെയ്യൂ