'ഒറ്റ കൈയിൽ ഒട്ടി നിന്നു' സിക്സിലേക്ക് പോയ ആ ബോൾ! അമ്പരപ്പിക്കും ​ഗ്ലെൻ ഫിലിപ്സ് ക്യാച്ച് (വിഡിയോ)

അമ്പരപ്പിക്കുന്ന ക്യാച്ചുകൾ എടുക്കുന്നതിലും പറന്ന് പന്ത് തടയുന്നതിലും അസാമാന്യ വൈഭവം പ്രകടിപ്പിക്കുന്ന താരമാണ് ന്യൂസിലൻഡിന്റെ ​ഗ്ലെൻ ഫിലിപ്സ്. താരത്തിന്റെ ഏറ്റവും പുതിയൊരു ക്യാച്ചാണ് ഇപ്പോൾ സമൂഹ മാധ്യമങ്ങളിൽ വൈറലായി മാറിയിരിക്കുന്നത്. കരീബിയൻ പ്രീമിയർ ലീ​ഗ് പോരാട്ടത്തിലാണ് താരത്തിന്റെ ഒറ്റ കൈകൊണ്ടുള്ള ബൗണ്ടറി ലൈനിനരികിൽ നിന്നുള്ള ക്യാച്ച്. ​ഗയാന ആമസോൺ വാരിയേഴ്സും ട്രിൻബാ​ഗോ നൈറ്റ്റൈഡേഴ്സും തമ്മിലുള്ള മത്സരത്തിനിടെയാണ് ​ഗ്ലെൻ ഫിലിപ്സിന്റെ ഈ മാസ്മരിക ക്യാച്ചിന്റെ പിറവി. ഇതിന്റെ വിഡിയോയാണ് വൈറലയത്.

മത്സരത്തിൽ ആദ്യം ബാറ്റ് ചെയ്ത ​ഗയാന നിശ്ചിത ഓവറിൽ 5 വിക്കറ്റ് നഷ്ടത്തിൽ 185 റൺസെടുത്തു. വിജയത്തിലേക്ക് ബാറ്റേന്തിയ ട്രിൻബാ​ഗോ നൈറ്റ്റൈഡേഴ്സിനായി ഓപ്പണറായി എത്തിയ സുനിൽ നരെയ്നെയാണ് ഫിലിപ്സ് ഫീൽഡിങ് മികവിൽ പുറത്താക്കിയത്.

ഡ്വെയ്ൻ പ്രിട്ടോറിയസ് എറിഞ്ഞ ഷോട്ട് പന്തിൽ സിക്സർ തൂക്കാനായി നരെയ്ൻ ലെ​ഗ് സൈഡിലേക്ക് ശക്തമായി പന്ത് അടിച്ചു പറത്തി. ഡീപ് സ്ക്വയർ ലെ​ഗിൽ ഫീൽഡ് ചെയ്യുകയായിരുന്ന ഫിലിപ്സ് പന്ത് വരുന്ന ദിശയിലേക്ക് പെട്ടെന്നു തന്നെ ഓടിക്കയറി. തുടക്കത്തിൽ പന്തിന്റെ ​​ഗതി മനസിലാക്കുന്നതിൽ താരത്തിനു ചെറിയ പിഴവ് സംഭവിച്ചെങ്കിലും കിവി താരം സമചിത്തത കൈവിട്ടില്ല. പെട്ടെന്നു തന്നെ വേ​ഗത കുറച്ച് വലതു കൈ നീട്ടി വായുവിൽ വച്ച് പന്ത് അത്ഭുതകരമായി കൈയിലൊതുക്കി. താൻ എടുത്ത ക്യാച്ചിന്റെ അത്ഭുതത്തിൽ ഫിലിപ്സ് പോരും അമ്പരന്ന് ചിരിക്കുന്നത് വിഡിയോയിൽ കാണാം.

മഴയെ തുടർന്നു മത്സരം തടസപ്പെട്ടിരുന്നു. ആദ്യം ബാറ്റ് ചെയ്ത ​ഗയാനയ്ക്കായി ഷിമ്രോൺ ഹെറ്റ്മെയർ 43 പന്തിൽ 9 സിക്സും 8 ഫോറും സഹിതം 111 റൺസ് അടിച്ചു കൂട്ടി. അതോടെ ടീം സ്കോർ 185ൽ എത്തി. താരത്തിന്റെ സിപഎല്ലിലെ രണ്ടാം സെഞ്ച്വറിയാണിത്. മറുപടി പറയാനിറങ്ങിയ ട്രിൻബാ​ഗോ നൈറ്റ്റൈഡേഴ്സിന്റെ പോരാട്ടം 7 വിക്കറ്റ് നഷ്ടത്തിൽ 172 റൺസിൽ അവസാനിച്ചു.