ന്യൂഡല്‍ഹി: ഐപിഎല്‍ പതിനാലാം സീസണ്‍ മത്സരങ്ങള്‍ യുഎഇയില്‍ പുനരാരംഭിച്ചതിന് ശേഷം ഒരു ഓവര്‍ പോലും മുംബൈക്ക് വേണ്ടി എറിയാതെ ഹര്‍ദിക് പാണ്ഡ്യ. ഇതോടെ ബാറ്റ്‌സ്മാന്‍ എന്ന നിലയില്‍ മാത്രമാണോ ഹര്‍ദിക്കിനെ പ്ലേയിങ് ഇലവനില്‍ ഉള്‍പ്പെടുത്തിയത് എന്ന ചോദ്യമാണ് ഉയരുന്നത്. 

ഹര്‍ദിക്ക് ബൗള്‍ ചെയ്യാത്തത് ഇന്ത്യക്ക് വലിയ തിരിച്ചടിയാകുമെന്ന് ചൂണ്ടിക്കാണിച്ച് എത്തുകയാണ് മുന്‍ താരങ്ങളായ സുനില്‍ ഗാവസ്‌കര്‍, ഗൗതം ഗംഭീര്‍ ഉള്‍പ്പെടെയുള്ളവര്‍. ഇന്ത്യയുടെ ബാറ്റിങ് ലൈനപ്പിലെ ആശങ്ക ഹര്‍ദിക് ആണെന്ന് ഗംഭീര്‍ പറയുന്നു. 

ഇപ്പോള്‍ എന്നെ സംബന്ധിച്ച് ഹര്‍ദിക് ഒരു വണ്‍ ഫോര്‍മാറ്റ് താരം മാത്രമാണ്. വൈറ്റ്‌ബോള്‍ ക്രിക്കറ്റില്‍ മാത്രമാണ് കളിക്കുന്നത്. അവിടെ ബൗളിങ് കൂടി ചെയ്യാതെ നില്‍ക്കുന്ന സാഹചര്യത്തിലും ഹര്‍ദിക്കിനെ ട്വന്റി20 ടീമില്‍ ഉള്‍പ്പെടുത്തി. ട്വന്റി20 ലോകകപ്പില്‍ തന്റെ നാല് ഓവര്‍ ഹര്‍ദിക് എറിയുമോ എന്ന് സെലക്ടര്‍മാര്‍ വ്യക്തമാക്കണം എന്നും ഗംഭീര്‍ പറഞ്ഞു. 

ഓള്‍റൗണ്ടറായാണ് ഹര്‍ദിക്കിനെ ഇന്ത്യയുടെ ലോകകപ്പ് സംഘത്തില്‍ ഉള്‍പ്പെടുത്തിയിരിക്കുന്നത് എന്ന് സുനില്‍ ഗാവസ്‌കര്‍ ചൂണ്ടിക്കാണിച്ചു. ആറാമതോ ഏഴാമതോ ബാറ്റിങ്ങിന് ഇറങ്ങിയിട്ട് ബൗള്‍ ചെയ്യാന്‍ തയ്യാറല്ലെങ്കില്‍ അത് ക്യാപ്റ്റന് ബുദ്ധിമുട്ട് സൃഷ്ടിക്കുമെന്നും ഗാവസ്‌കര്‍ പറഞ്ഞു.