ബാം​ഗളൂർ; മുന്‍ അന്താരാഷ്ട്ര ഹോക്കി അമ്പയര്‍ അനുപമ പഞ്ചിമണ്‍ഡ കോവിഡ് ബാധിച്ച് മരിച്ചു. 40 വയസായിരുന്നു. ഞായറാഴ്ച രാവിലെ ബാംഗളൂരുവിലായിരുന്നു അന്ത്യം. പത്ത് ദിവസം മുൻപ് കോവിഡ് ബാധിച്ചതിനെ തുടർന്ന് വീട്ടിൽ നിരീക്ഷണത്തിൽ കഴിയുകയായിരുന്നു. രോ​ഗമുക്തി നേടുന്നതിനിടെയായിരുന്നു അപ്രതീക്ഷിത വിയോ​ഗം. 

കർണാടകയുടെ കളിക്കാരിയായിരുന്ന അനുപമ പിന്നീടാണ് അമ്പയറായി എത്തുന്നത്. കർണാടകയിൽ നിന്നുള്ള ആദ്യത്തെ വനിത അന്താരാഷ്ട്ര അമ്പയറാണ്. നേരത്തെ ദേശീയ തലത്തില്‍ കളിച്ചിരുന്ന അനുപമ 2005-ല്‍ സാന്റിയാഗോയില്‍ നടന്ന വനിതാ ബി.ഡി.ഒ ജൂനിയര്‍ ലോകകപ്പ്, 2013-ല്‍ ന്യൂഡല്‍ഹിയില്‍ നടന്ന വനിതാ ഹീറോ ഹോക്കി വേള്‍ഡ് ലീഗ് റൗണ്ട്-2, 2013-ല്‍ ക്വലാലംപുരില്‍ നടന്ന വനിതാ ഏഷ്യാ കപ്പ് എന്നീ ടൂര്‍ണമെന്റുകളില്‍ മത്സരങ്ങള്‍ നിയന്ത്രിച്ചിട്ടുണ്ട്.