'നിന്റെ അച്ഛന്റെ മുഖത്ത് നോക്കി ഞാനും ചിരിക്കും'; മെസിയെ പരിഹസിച്ച ആരാധകന് മകന്റെ മറുപടി

മാഡ്രിഡ്: മെസിയെ പരിഹസിച്ച് എത്തിയ ആരാധകന് മറുപടി നല്‍കി മകന്‍ തിയാഗോ മെസി. മെസിയുടെ വീടിന് മുന്‍പിലെത്തിയ ആള്‍ക്കൂട്ടത്തില്‍ ഒരാള്‍ക്ക് നേരെയാണ് തിയാഗോയുടെ വായടപ്പിക്കുന്ന വാക്കുകള്‍ എത്തിയത്. 

മെസി എവിടെ, ഞങ്ങള്‍ക്ക് അയാളുടെ മുഖത്ത് നോക്കി ചിരിക്കണം എന്നാണ് ആള്‍ക്കൂട്ടത്തില്‍ ഒരാള്‍ പറഞ്ഞത്. എങ്കില്‍ നിന്റെ അച്ഛന്റെ മുഖത്ത് നോക്കി ഞാനും ചിരിക്കും എന്നായിരുന്നു ഇത് കേട്ട് ഇറങ്ങി വന്ന തിയാഗോയുടെ മറുപടി. 

തിയാഗോയുടെ മറുപടി അവിടെ കൂടി നിന്നവരിലും ചിരി പടര്‍ത്തി. അച്ഛന് വേണ്ടി മുന്‍പില്‍ നിന്ന തിയാഗോയുടെ സ്‌നേഹമാണ് ആരാധകരുടെ മനം കവരുന്നത്. ഇതിന്റെ വീഡിയോ സമൂഹമാധ്യമങ്ങളില്‍ വൈറലായി പടരുന്നു. 

മെസി ഇന്ന് പാരിസിലേക്ക് എത്തും എന്ന അഭ്യൂഹം പടര്‍ന്നതോടെ പാരിസ് വിമാനത്താവളത്തില്‍ പിഎസ്ജി ആരാധകരുടെ വലിയൊരു കൂട്ടം മെസിയെ പ്രതീക്ഷിച്ച് നിന്നിരുന്നു. പിഎസ്ജിയുമായി മെസി രണ്ട് വര്‍ഷത്തെ കരാര്‍ ഒപ്പിടുമെന്നാണ് റിപ്പോര്‍ട്ടുകള്‍.