'ഇത് രോഹിത്തിന്റെ ട്രിക്ക്, SENA രാജ്യങ്ങള്‍ക്കെതിരെ ടെസ്റ്റ് വരുമ്പോള്‍ പരിക്ക്'; പരിഹാസവുമായി ആരാധകര്‍

ന്യൂഡല്‍ഹി: സൗത്ത് ആഫ്രിക്കന്‍ പര്യടനത്തിലെ ടെസ്റ്റ് പരമ്പരയില്‍ നിന്ന് പിന്മാറിയതിന് പിന്നാലെ രോഹിത് ശര്‍മയെ ട്രോളി ആരാധകര്‍. സൗത്ത് ആഫ്രിക്ക, ഇംഗ്ലണ്ട്, ന്യൂസിലാന്‍ഡ്, ഓസ്‌ട്രേലിയ എന്നീ SENA രാജ്യങ്ങള്‍ക്കെതിരെ എല്ലാം ടെസ്റ്റ് പരമ്പര വരുമ്പോള്‍ പരിക്ക് പറ്റുന്ന ആദ്യ താരം എന്ന് ചൂണ്ടിയാണ് ട്രോള്‍ മഴ. 

പ്രധാനപ്പെട്ട ടെസ്റ്റ് പരമ്പരകള്‍ മുന്‍പില്‍ വരുമ്പോഴെല്ലാം രോഹിത്തിന് പരിക്കേല്‍ക്കുന്നതായാണ് ആരാധകരുടെ പരിഹാസം. 2014ലെ ഇംഗ്ലണ്ട് പര്യടനത്തിലെ ടെസ്റ്റ് പരമ്പരയില്‍ പരിക്ക്. ന്യൂസിലാന്‍ഡ് പര്യടനത്തിലെ ടെസ്റ്റ് പരമ്പരക്ക് മുന്‍പ് പരിക്ക്. 2020ലെ ഓസ്‌ട്രേലിയന്‍ പര്യടനത്തിലെ ടെസ്റ്റ് പരമ്പരക്ക് മുന്‍പ് പരിക്ക്. 2021ലെ സൗത്ത് ആഫ്രിക്കയ്ക്ക് എതിരായ ടെസ്റ്റ് പരമ്പരക്ക് മുന്‍പ് പരിക്ക്. ഇതെല്ലാം ചൂണ്ടിയാണ് ആരാധകരുടെ പരിഹാസം. 

മുംബൈയിലെ നെറ്റ്‌സില്‍ പരിശീലനം നടത്തവെ പരിക്കേല്‍ക്കുകയായിരുന്നു എന്നാണ് റിപ്പോര്‍ട്ട്. നേരത്തെ തന്നെ താരത്തെ അലട്ടിയിരുന്ന കാല്‍ തുടയിലെ പേശിയുടെ പ്രശ്‌നമാണ് വീണ്ടും ഉടലെടുത്തത് എന്ന് റിപ്പോര്‍ട്ടുകളുണ്ട്. എന്നാല്‍ ത്രോഡൗണില്‍ വിരലില്‍ പന്ത് കൊണ്ടതാണെന്നും റിപ്പോര്‍ട്ടുകള്‍ വരുന്നു.