കോഹ്‌ലിയുടെ തന്ത്രങ്ങള്‍ മനസിലാക്കാന്‍ പ്രയാസം; ഫീല്‍ഡിലെ തീരുമാനങ്ങള്‍ ചൂണ്ടി സഞ്ജയ് മഞ്ജരേക്കര്‍

ന്യൂഡല്‍ഹി: ഇംഗ്ലണ്ടിനെതിരായ ആദ്യ ടെസ്റ്റിലെ ഇന്ത്യയുടെ തന്ത്രങ്ങളെ ചോദ്യം ചെയ്ത് മുന്‍ താരം സഞ്ജയ് മഞ്ജരേക്കര്‍. ഇന്ത്യയുടെ തന്ത്രങ്ങള്‍ പൂര്‍ണമായും മോശമാണ് എന്ന് പറയുന്നില്ലെങ്കിലും, കോഹ് ലിയുടെ പല തീരുമാനങ്ങളും മനസിലാക്കാന്‍ സാധിക്കുന്നില്ലെന്ന് മഞ്ജരേക്കര്‍ പറഞ്ഞു. 

കോഹ്‌ലിയുടെ ഫീല്‍ഡിലെ തീരുമാനങ്ങളാണ് മഞ്ജരേക്കര്‍ ചോദ്യം ചെയ്യുന്നത്. 
ഇന്ത്യയുടേത് മോശം തന്ത്രങ്ങളാണെന്ന് ഞാന്‍ പറയില്ല. ടീം സെലക്ഷനില്‍ പ്രശ്മില്ല എന്ന് പറയാം. ഷഹ്ബാസ് നദീം നന്നായി കളിക്കാത്തതിനാല്‍ മാത്രമാണ് കുല്‍ദീപിനെ കുറിച്ച് ഇപ്പോള്‍ ആളുകള്‍ പറയുന്നത്. തന്ത്രപരമായി നോക്കിയാല്‍, വാഷിങ്ടന്‍ സുന്ദര്‍ തെറ്റായ ലൈനിലാണ് പന്തെറിഞ്ഞ് തുടങ്ങിയത്. 

ഔട്ട്‌സൈഡ് ഓഫ് സ്റ്റിംപിലേക്ക് ബൗള്‍ ചെയ്യാന്‍ വളരെ മികവുള്ള ബൗളറാണ് സുന്ദര്‍. അങ്ങനെ ചെയ്തപ്പോള്‍ ബാറ്റ്‌സ്മാനെ അത് കുഴക്കി. അവിടെയാണ് കോഹ് ലിയെ മനസിലാക്കാന്‍ പ്രയാസമാകുന്നത്. ആകെ തുകയായി ഇന്ത്യന്‍ ടീമിന്റെ തന്ത്രങ്ങളെടുക്കുമ്പോഴും, ടീമിന്റെ സെലക്ഷന്‍ നോക്കുമ്പോഴും ചേരായ്മ കാണാം, മഞ്ജരേക്കര്‍ പറയുന്നു. 

നദീമിന്റെ ആദ്യ ഓവറുകളില്‍ ബൗളര്‍ ആഗ്രഹിച്ച സ്ഥലത്തായിരിക്കില്ല എറിയാന്‍ അനുവദിച്ചിട്ടുള്ളത്. തന്ത്രങ്ങളില്‍ ഇന്ത്യയേക്കാള്‍ മികവ് കാണിച്ചത് ഇംഗ്ലണ്ട് ആണ്. എന്നാല്‍ ഇന്ത്യയുടെ തന്ത്രങ്ങള്‍ അബദ്ധമായി മാറിയെന്ന് താന്‍ പറയില്ലെന്നും മഞ്ജരേക്കര്‍ പറഞ്ഞു.