2001ൽ ടിനു യോഹന്നാൻ; 25 വർഷം ആർക്കും നേട്ടമില്ല; 2026ൽ മാനവ് സുതർ! അരങ്ങേറ്റത്തിൽ തന്നെ എലീറ്റ് പട്ടികയിൽ

ന്യൂ ചണ്ഡീ​ഗഢ്: ഇന്ത്യക്കായി ടെസ്റ്റിൽ സ്വപ്ന സമാന അരങ്ങേറ്റവുമായി സ്പിന്നർ മാനവ് സുതർ. ടെസ്റ്റിൽ അരങ്ങേറ്റ ഓവറിൽ തന്നെ വിക്കറ്റ് വീഴ്ത്തുന്ന എട്ടാമത്തെ ഇന്ത്യൻ താരമായും മാനവ് ചരിത്രമെഴുതി. 25 വർഷങ്ങൾക്കു ശേഷമാണ് ഒരു ഇന്ത്യൻ ബൗളർ ഇത്തരമൊരു നേട്ടത്തിലെത്തുന്നത്. 2001ൽ മലയാളി താരം ടിനു യോഹന്നാനാണ് അവസാനമായി ഇന്ത്യക്കായി ടെസ്റ്റിൽ അരങ്ങേറ്റം കുറിച്ച് ആദ്യ ഓവറിൽ തന്നെ വിക്കറ്റ് വീഴ്ത്തിയ ബൗളർ.

അഫ്ഗാനിസ്ഥാനെതിരെയുള്ള ഏക ടെസ്റ്റിന്റെ രണ്ടാം ദിനം ചായ കഴിഞ്ഞയുടൻ ക്യാപ്റ്റൻ ശുഭ്മാൻ ഗിൽ പന്ത് ഇടം കൈയൻ സ്പിന്നർക്ക് കൈമാറിക്കൊണ്ട് ടെസ്റ്റ് ക്രിക്കറ്റിലെ തന്റെ ആദ്യ സ്പെല്ലിന് അവസരമൊരുക്കുകയായിരുന്നു. 23 കാരനായ ഈ യുവതാരം അധികം വൈകാതെ തന്നെ ഇന്ത്യക്ക് ആദ്യ ബ്രേക്ക് ത്രൂവും നൽകി. അഫ്​ഗാന് നഷ്ടമായ ആദ്യ വിക്കറ്റ് മാനവ് സ്വന്തമാക്കി. ടെസ്റ്റ് കരിയറിലെ തന്റെ നാലാമത്തെ പന്തിൽ തന്നെ സുതർ ആദ്യ വിക്കറ്റ് നേടി. അഫ്ഗാൻ താരം അബ്ദുൽ മാലിക് നടത്തിയ സ്വീപ്പ് ഷോട്ട് ടോപ് എഡ്ജായി മാറുകയും, ബാക്ക്വേർഡ് സ്ക്വയർ ലെഗിൽ നിന്ന് മുന്നോട്ട് ഡൈവ് ചെയ്തുകൊണ്ട് മുഹമ്മദ് സിറാജ് മനോഹരമായ ക്യാച്ചിലൂടെ താരത്തെ മടക്കുകയും ചെയ്തു.

ടെസ്റ്റ് കരിയറിലെ ആദ്യ ഓവറിൽ തന്നെ വിക്കറ്റ് വീഴ്ത്തിയതോടെ അരങ്ങേറ്റ ടെസ്റ്റ് മത്സരത്തിലെ ആദ്യ ഓവറിൽ വിക്കറ്റ് നേടുന്ന എട്ടാമത്തെ മാത്രം ഇന്ത്യൻ ക്രിക്കറ്ററായി മാനവ് സുതാർ മാറി. ഏതാണ്ട് എട്ട് പതിറ്റാണ്ടുകൾക്ക് പിന്നിലേക്ക് നീളുന്ന ഇന്ത്യൻ ക്രിക്കറ്റ് ചരിത്രത്തിലെ മറ്റ് ഏഴ് പേരുകൾ മാത്രമുള്ള എലീറ്റ് പട്ടികയിലാണ് മാനവ് ഇടം പിടിച്ചത്.

അരങ്ങേറ്റ ടെസ്റ്റിലെ ആദ്യ ഓവറിൽ വിക്കറ്റ് നേടിയ ഇന്ത്യൻ താരങ്ങൾ

മോൻടു ബാനർജി (വെസ്റ്റ് ഇൻഡീസിനെതിരെ, 1948)

മനോഹർ ഹർദികർ (വെസ്റ്റ് ഇൻഡീസിനെതിരെ, 1958)

വാമൻ കുമാർ (എതിരാളികൾ: പാകിസ്ഥാനെതിരെ, 1961)

ചേതൻ ശർമ്മ (എതിരാളികൾ: പാകിസ്ഥാനെതിരെ, 1984)

ഡബ്ല്യു. വി. രാമൻ (വെസ്റ്റ് ഇൻഡീസിനെതിരെ, 1988)

നിലേഷ് കുൽക്കർണി (ശ്രീലങ്കക്കെതിരെ, 1997)

ടിനു യോഹന്നാൻ (ഇംഗ്ലണ്ടിനെതിരെ, 2001)

മാനവ് സുതർ (അഫ്ഗാനിസ്ഥാനെതിരെ, 2026)

2001ൽ ഇംഗ്ലണ്ടിനെതിരെയുള്ള തന്റെ അരങ്ങേറ്റ മത്സരത്തിലെ ആദ്യ ഓവറിൽ ടിനു യോഹന്നാൻ, മാർക്കസ് ട്രെസ്‌ക്കോത്തിക്കിനെ പുറത്താക്കിയതിന് ശേഷം കഴിഞ്ഞ 25 വർഷമായി മറ്റൊരു ഇന്ത്യൻ താരവും ഈ നേട്ടം കൈവരിച്ചിട്ടില്ല എന്നതുതന്നെ സുതറിന്റെ നേട്ടത്തെ കൂടുതൽ സവിശേഷമാക്കുന്നു. സഹ സ്പിൻ ബൗളിങ് ഓൾറൗണ്ടറായ ഹർഷ് ദുബെയ്ക്ക് മുകളിൽ ടീം മാനേജ്‌മെന്റ് അർപ്പിച്ച വിശ്വാസം മാനവ് നിമിഷങ്ങൾക്കകം കാത്തുസൂക്ഷിച്ചു.

മത്സരത്തിന് മുന്നോടിയായി സീനിയർ സ്പിന്നർ കുൽദീപ് യാദവിൽ നിന്ന് 319ാം നമ്പർ ടെസ്റ്റ് ക്യാപ് സ്വീകരിച്ച മാനവ് 2021ൽ അക്ഷർ പട്ടേൽ അരങ്ങേറ്റം കുറിച്ചതിന് ശേഷം ഇന്ത്യക്കായി ടെസ്റ്റ് ക്യാപ് നേടുന്ന ആദ്യ സ്പെഷ്യലിസ്റ്റ് സ്പിൻ ബൗളിങ് അരങ്ങേറ്റക്കാരൻ കൂടിയാണ്.