'രാഷ്ട്രിയത്തിലേക്ക് അല്ല, ബിസിസിഐയില്‍ നിന്ന് രാജിവെക്കില്ല'; വിശദീകരണവുമായി ഗാംഗുലി

കൊല്‍ക്കത്ത: ബിസിസിഐ അധ്യക്ഷ സ്ഥാനം ഒഴിഞ്ഞ് രാഷ്ട്രിയത്തിലേക്ക് എന്ന റിപ്പോര്‍ട്ടുകള്‍ തള്ളി മുന്‍ ക്രിക്കറ്റ് താരം സൗരവ് ഗാംഗുലി. ഒരുപാട് പേര്‍ക്ക് സഹായകമാവുന്ന ഒന്നിലേക്ക് വരുന്നു എന്ന ഗാംഗുലിയുടെ ട്വീറ്റ് ചര്‍ച്ചയാതതോടെയാണ് അദ്ദേഹം വ്യക്തത വരുത്തിയത്. 

ബിസിസിഐയുടെ അധ്യക്ഷ സ്ഥാനത്ത് നിന്നും ഞാന്‍ രാജിവെച്ചിട്ടില്ല. എല്ലാവര്‍ക്കും സഹായകമാവുന്ന ഒരു എഡ്യൂക്കേഷന്‍ ആപ്പ് തുടങ്ങാന്‍ പോകുന്നു. മറ്റ് വാര്‍ത്തകളില്‍ വസ്തുതയില്ല, ഗാംഗുലി വ്യക്തമാക്കി. ഗാംഗുലി ബിസിസിഐ പ്രസിഡന്റ് സ്ഥാനം രാജിവെച്ചേക്കുമെന്ന റിപ്പോര്‍ട്ടുകള്‍ ബിസിസിഐ സെക്രട്ടറി ജയ് ഷായും തള്ളിയിരുന്നു. 

ബുധനാഴ്ച ഏറെ ചര്‍ച്ചയായ ഗാംഗുലി പങ്കുവെച്ച പ്രസ്താവന ഇങ്ങനെ, '1992ല്‍ തുടങ്ങിയ ക്രിക്കറ്റ് യാത്രക്ക് ഈ വര്‍ഷം 30 വര്‍ഷം തികയുകയാണ്. നിങ്ങളുടെ കരുത്തുറ്റ പിന്തുണയുടെ ബലത്തില്‍ ക്രിക്കറ്റില്‍ നിന്ന് ഒരുപാട് നേട്ടങ്ങള്‍ സ്വന്തമാക്കി. നിങ്ങള്‍ നല്‍കിയ പിന്തുണയും സഹായവുമാണ് ഈ നിലയില്‍ എനിക്ക് എത്താന്‍ സാധിച്ചതിന് പിന്നില്‍. ഈ യത്രയുടെ ഭാഗമായ ഓരോരുത്തര്‍ക്കും ഞാന്‍ പ്രത്യേകം നന്ദി പറയുന്നു. ഇന്ന് ഞാന്‍ പുതിയൊരു പദ്ധതിക്ക് തുടക്കമിടാന്‍ ഒരുങ്ങുകയാണ്. നിരവധി ആളുകളെ സഹായിക്കണമെന്ന് എനിക്കുണ്ട്. എന്റെ ജീവിതത്തിലെ ഈ പുതിയ അധ്യായത്തിനും നിങ്ങളുടെ പിന്തുണയുണ്ടാകുമെന്ന് ഞാന്‍ പ്രതീക്ഷിക്കുന്നു.'

ഈ വാർത്ത കൂടി വായിക്കാം 

6 ഓവറില്‍ 120 റണ്‍സ് വരെ നേടും; അഞ്ച്, ആറ് സ്ഥാനത്ത് പന്തിനേയേും ഹര്‍ദിക്കിനേയും ഇറക്കൂ: സുനില്‍ ഗാവസ്‌കര്‍

സമകാലിക മലയാളം ഇപ്പോൾ വാട്ട്‌സ്ആപ്പിലും ലഭ്യമാണ്. ഏറ്റവും പുതിയ വാർത്തകൾ അറിയാൻ ക്ലിക്ക് ചെയ്യൂ