​സീസണിൽ മാഞ്ചസ്റ്റർ യുനൈറ്റഡിന്റെ ഹൃദയതുടിപ്പായ താരം. യൂറോയിൽ ക്രിസ്റ്റ്യാനോയും ബ്രൂണോയും കൂടി ചേരുമ്പോൾ അത്ഭുതങ്ങൾ പ്രതീക്ഷിച്ചിരുന്ന ആരാധകർക്ക് പാടെ തെറ്റി. ക്രിസ്റ്റ്യാനോയുടെ നിഴലിലേക്ക് വീണതോടെ ബ്രൂണോയ്ക്ക് ഓൾഡ് ട്രഫോർഡിൽ പുറത്തെടുത്ത മികവ് ആവർത്തിക്കാനാവുന്നില്ല. 

പോർച്ചു​ഗലിന്റെ ആദ്യ രണ്ട് മത്സരങ്ങളിലും ബ്രൂണോ നിരാശപ്പെടുത്തി. 4-2ന്റെ തോൽവിയിലേക്ക് ജർമനിക്കെതിരെ പോർച്ചു​ഗൽ വീണതിന് പിന്നാലെ മധ്യനിരയിൽ കളി കൈവിടുന്നതാണ് തിരിച്ചടിയാവുന്നത് എന്ന വിലയിരുത്തലുകൾ ഉയർന്നു. അവിടെ ബ്രൂണോ ഫെർണാണ്ടസിനെ മാത്രം പഴി ചാരാൻ സാധിക്കില്ലെന്ന വാദവും ശക്തമാണ്. 

സീസണിൽ മാഞ്ചസ്റ്റർ യുനൈറ്റഡ് പ്രീമിയർ ലീ​ഗിൽ മൂന്നാം സ്ഥാനം പിടിച്ചപ്പോൾ വിരലുകളെല്ലാം ചൂണ്ടപ്പെട്ടത് ബ്രൂണോയ്ക്ക് നേരെയാണ്. എന്നാൽ ഹം​ഗറിക്കും ജർമനിക്കും എതിരെ ബ്രൂണോ നിശബ്ദനായിരുന്നു. ജർമനിക്കെതിരെ 64ാം മിനിറ്റിൽ സബ്സ്റ്റിറ്റ്യൂട്ട് ചെയ്യപ്പെടുമ്പോൾ ബ്രൂണോയിൽ നിന്ന് ആ സമയം വരെ വന്നത് ഒരു പ്രധാനപ്പെട്ട പാസ് മാത്രം. ഒരു ടാക്കിളോ, ഇന്റർസെപ്ഷനോ, ഷോട്ടോ, ഡ്രിബിളോ ജർമനിക്കെതിരെ ബ്രൂണോയിൽ നിന്ന് വന്നില്ല. പോർച്ചു​ഗൽ ഏഴ് ​ഗോൾ യൂറോയിൽ ഇതുവരെ നേടിയപ്പോൾ ഇതിലൊന്നും ബ്രൂണോയുടെ അസിസ്റ്റ് ഇല്ല. പറയാനാവുന്നത് ഹം​ഗറിക്കെതിരായ രണ്ട് ഷോട്ടുകൾ മാത്രം

11 കളിക്കാരുമായാണ് കളിക്കേണ്ടത്. എന്നാൽ കഴിഞ്ഞ രണ്ട് കളിയിലും ബ്രൂണോ പിച്ചിലുണ്ടായി. എന്നാൽ കളിച്ചില്ല, മാഞ്ചസ്റ്റർ യുനൈറ്റഡ് മുൻ പരിശീലകൻ മൗറി‍ഞ്ഞോ പറഞ്ഞു. ഓൾഡ് ട്രഫോർഡിലെ 18 മാസത്തിൽ 40 ​ഗോളും 25 അസിസ്റ്റുമാണ് ബ്രൂണോയിൽ നിന്ന് വന്നത്. മാഞ്ചസ്റ്റർ യുനൈറ്റഡ് ജേഴ്സിയിൽ സ്വതന്ത്രനായി കളിക്കുന്ന താരം ദേശിയ ടീമിലേക്ക് എത്തുമ്പോൾ ഉൾവലിയുന്നു. പാസ് നഷ്ടപ്പെടുമ്പോൾ ഓൾഡ് ട്രഫോർഡിൽ കൈകളുയർത്തി നിരാശ പ്രകടിപ്പിക്കുന്ന താരം പോർച്ചു​ഗൽ കുപ്പായം അണിയുമ്പോൾ മറ്റൊരു വ്യക്തിയാവുന്നു. 

ക്രിസ്റ്റ്യാനോയെ പ്രധാന താരമായി വെച്ചുകൊണ്ട് മുൻപോട്ട് പോവുന്ന പോർച്ചു​ഗലിന്റെ ​ഗെയിം പ്ലാൻ ബ്രൂണോയ്ക്ക് ഇണങ്ങുന്നില്ലെന്ന് വ്യക്തം. യുനൈറ്റഡിന്റെ ​ഫ്രീകിക്ക്, സ്പോട്ട് കിക്ക് എടുക്കുന്ന പ്രധാന താരം ഇവിടെ ക്രിസ്റ്റ്യാനോ ഉത്തരവാദിത്വങ്ങൾ ഏറ്റെടുക്കുമ്പോൾ പൂർണമായും പിന്നിലേക്ക് വലിയുന്നു. അഞ്ച് വർഷം മുൻപ് നേടിയ കിരീടം നിലനിർത്തണം എങ്കിൽ ഇത്തവണ ക്രിസ്റ്റ്യാനോ മാത്രം പോർച്ചു​ഗലിനായി നിറഞ്ഞു കളിച്ചാൽ പോരെന്ന് വ്യക്തം.