ബംഗളൂരു: ഐപിഎല്‍ 2026ലെ ഉദ്ഘാടന മത്സരം മഴ മുടക്കുമോ എന്ന ആശങ്കയിലാണ് ക്രിക്കറ്റ് ആരാധകർ. എം ചിന്നസ്വാമി സ്‌റ്റേഡിയത്തില്‍ ഇന്ന് നടക്കുന്ന മത്സരത്തിൽ നിലവിലെ ചാംപ്യൻമാരായ റോയല്‍ ചലഞ്ചേഴ്‌സ് ബംഗളൂരുവും സണ്‍റൈസേഴ്‌സ് ഹൈദരാബാദുമാണ് ഏറ്റുമുട്ടുന്നത്. ഈ മത്സരത്തിനിടെ മഴ പെയ്തേക്കാം എന്നാണ് കാലാവസ്ഥ വകുപ്പിന്റെ പ്രവചനം.

മത്സരം നടക്കുന്ന സമയത്ത് 22 ഡിഗ്രി സെല്‍ഷ്യസാകും താപനില. അന്തരീക്ഷം മേഘാവൃതമായിരിക്കുമെന്നും മഴ പെയ്യാൻ നേരിയ സാധ്യതയുണ്ട് എന്നാണ് കാലാവസ്ഥ വകുപ്പ് പറയുന്നത്. മഴയ്ക്ക് പുറമെ ശക്തമായ കാറ്റിനും ഇടിമിന്നലിനും സാധ്യതയുണ്ട്. കഴിഞ്ഞ ആഴ്ചയിൽ പെയ്ത വലിയ മഴയ്‌ക്കൊപ്പം ആലിപ്പഴ വീഴ്ചയും ഉണ്ടായിരുന്നു. സമാനമായ സാഹചര്യം ഉണ്ടായാൽ മത്സരം തന്നെ തടസ്സപ്പെട്ടേക്കാം.

ബംഗളൂരുവിലും പരിസരപ്രദേശങ്ങളിലും ഏപ്രില്‍ 5 വരെ മഴയ്ക്ക് സാധ്യതയുണ്ടെന്ന് നേരത്തെ കേന്ദ്ര കാലാവസ്ഥ വകുപ്പ് അറിയിച്ചിരുന്നു. മത്സരം മഴ മൂലം ഉപേക്ഷിച്ചാൽ ഇരു ടീമുകൾക്കും ഓരോ പോയിന്റ് വീതം ലഭിക്കും.