ലീഡ്‌സ്: ലോകകപ്പ് ക്രിക്കറ്റിൽ ശ്രീലങ്ക നിലനിൽപ്പിനായുള്ള കഠിന ശ്രമത്തിലാണ്. രണ്ട് മത്സരങ്ങൾ മഴ കാരണം ഫലം കാണാതെ പോയത് അവരുടെ തിരിച്ചടിയുടെ ആഴം കൂട്ടി. ഇം​ഗ്ലണ്ടിനെതിരായ നിർണായക പോരാട്ടത്തിൽ വിജയം സ്വന്തമാക്കി അവർ പ്രതീക്ഷ കാത്തു. ഇം​ഗ്ലണ്ടിനെതിരായ മത്സരത്തിൽ നാല് വിക്കറ്റുകൾ വീഴ്ത്തിയ വെറ്ററൻ പേസർ ലസിത് മലിം​ഗയുടെ ബൗളിങ് മികവിലാണ് ലങ്ക വിജയം  സ്വന്തമാക്കിയത്. 

കളിയിലെ താരമായി തിരഞ്ഞെടുക്കപ്പെട്ട മലിം​ഗ ഈ ലോകകപ്പിൽ ശ്രീലങ്കൻ വിക്കറ്റ് വേട്ടക്കരുടെ പട്ടികയില്‍ ഒന്നാമനാണ്. നാല് മത്സരങ്ങളില്‍ നിന്ന് എട്ട് വിക്കറ്റുമായി ഈ ലോകകപ്പിലെ വിക്കറ്റ് വേട്ടക്കാരുടെ പട്ടികയില്‍ പത്താം സ്ഥാനത്തും മലിം​ഗ നിൽക്കുന്നു. ഇപ്പോഴിതാ മറ്റൊരു നേട്ടവും മലിം​ഗ സ്വന്തമാക്കി.

ഇം​ഗ്ലണ്ടിനെതിരായ മത്സരത്തിൽ ജോ റൂട്ടിന്റെ വിക്കറ്റ് വീഴ്ത്തിയതോടെ ലോകകപ്പില്‍ 50 വിക്കറ്റുകള്‍ എന്ന നേട്ടവും മലിംഗ സ്വന്തമാക്കി. റൂട്ടിന് പുറമേ ജെയിംസ് വിന്‍സ്, ജോണി ബെയര്‍സ്‌റ്റോ, ജോസ് ബട്ട്‌ലര്‍ എന്നിവരുടെ വിക്കറ്റുകളാണ് മലിം​ഗ നേടിയത്. 

ഇതോടെ ലോകകപ്പിലെ വിക്കറ്റ് വേട്ടയിൽ മുന്നിലുള്ള ഇതിഹാസ താരങ്ങൾക്കൊപ്പം പട്ടികയില്‍ നാലാമതാണ് ഇപ്പോള്‍ മലിംഗ. 71 വിക്കറ്റുമായി ഓസ്‌ട്രേലിയന്‍ ഇതിഹാസം ഗ്ലെന്‍ മഗ്രാത്താണ് ഒന്നാമത്. മറ്റൊരു ശ്രീലങ്കന്‍ താരമായിരുന്ന മുത്തയ്യ മുരളീധരന്‍ രണ്ടാമതും വസീം അക്രം മൂന്നാം സ്ഥാനത്തും നിൽക്കുന്നു.