പരിക്ക് പൂര്‍ണമായും ഭേദമാകാത്തതിനാല്‍ മുന്‍ ലോക ഒന്നാം നമ്പര്‍ താരം ആന്‍ഡി മുറെ ഓസ്‌ട്രേലിയന്‍ ഓപ്പണില്‍ നിന്ന് പിന്മാറി. കഴിഞ്ഞ വര്‍ഷം ഇടുപ്പിനേറ്റ പരിക്കുകാരണമാണ് താരത്തിന് ഓസ്‌ട്രേലിയന്‍ ഓപ്പണില്‍ കളിക്കാനാകാത്തത്. പരിക്കില്‍ നിന്ന പൂര്‍ണമായും മോചിതനായിട്ടില്ലെന്നും ഓസ്‌ട്രേലിയന്‍ ഓപ്പണില്‍ നിന്ന് വിട്ടുനില്‍ക്കുമെന്നും 30കാരനായ മുറെ അറിയിച്ചു. 

'ഇത്തവണ മെല്‍ബണില്‍ കളിക്കാന്‍ കഴിയില്ലെന്ന് അറിയിക്കുന്നതില്‍ വിഷമമുണ്ട്. കളിക്കളത്തിലിറങ്ങാനുള്ള അവസ്ഥയില്‍ ഇപ്പോഴും എത്തിയിട്ടില്ല, എല്ലാവരുടെയും പിന്തുണയ്ക്ക് നന്ദി', മുറെ തന്റെ പ്രസ്താവനയില്‍ കുറിച്ചു. 

ജനുവരി 15 മുതല്‍ 28വരെ നടക്കുന്ന ഓസ്‌ട്രേലിയന്‍ ഓപ്പണിന് മുമ്പ് പ്രമുഖ താരങ്ങള്‍ പരിക്കിന് പിടിയിലായത് സംഘാടകരെ ആശങ്കപ്പെടുത്തുന്നുണ്ട്. മുറെ പിന്മാറല്‍ അറയിക്കുന്നതിന് മുമ്പ് ജാപ്പനീസ് താരം കെയ് നിഷികോരിയും കളിക്കില്ലെന്ന് അറിയിച്ചിരുന്നു. ഇവര്‍ക്കുപുറമേ പ്രമുഖ താരങ്ങളായ റാഫേല്‍ നദാല്‍ നൊവാക് ജാങ്കോവിച്ച് എന്നിവരും പരിക്കിന്റെ പിടിയിലാണ്. എന്നാല്‍ ഇവര്‍ ഓസ്‌ട്രേലിയന്‍ ഓപ്പണില്‍ പങ്കെടുക്കുമെന്നാണ് ഇതുവരെ ലഭിച്ചിട്ടുള്ള വിവരം.