അഞ്ചാം ഏകദിന മത്സരത്തിനിടെ ഇന്ത്യന്‍ താരം ശിഖര്‍ ധവാനെ പരിഹസിച്ച ദക്ഷിണാഫ്രിക്കന്‍ ഫാസ്റ്റ് ബൗളര്‍ കഗിസോ റബാഡയ്ക്ക് ഐ.സി.സിയുടെ പിഴശിക്ഷ. ധവാന്‍ പുറത്തായതിന് പിന്നാലെ റബാഡ നടത്തിയ പരിഹാസ്യ ആംഗ്യങ്ങളാണ് നടപടിക്ക് ഇടയാക്കിയത്. റബാഡയുടെ പെരുമാറ്റം ചട്ടലംഘനമായി കണ്ടെത്തി ഐസിസി മാച്ച് ഫീയുടെ പതിനഞ്ച് ശതമാനമാണ് പിഴയായി ചുമത്തിയിരിക്കുന്നത്.

അഞ്ചാം ഏകദിനത്തില്‍ ബൗളര്‍മാരെ ആക്രമിച്ച് കളിച്ച ധവാനെ റബാഡ പുറത്താക്കുകയായിരുന്നു. എട്ടാം ഓവറില്‍ റബാഡയുടെ ബൗണ്‍സര്‍ അതിര്‍ത്തി കടത്താന്‍ നടത്തിയ ശ്രമം ഫെക്‌ലുക്കായുടെ കൈകളില്‍ ഒതുങ്ങുകയായിരുന്നു. ധവാന്റെ വിക്കറ്റ് നേടിയ ആവേശത്തില്‍ റബാഡ താരത്തിന് ടാറ്റ നല്‍കി ഗ്യാലറിയിലേക്കുള്ള വഴി കാട്ടിക്കൊടുക്കുകയും ചെയ്തു. ഇതിനിടെ താരം എന്തോ പ്രകോപനപരമായി സംസാരിക്കുകയും ചെയ്തു.