വീട്ടിനുള്ളിൽ ചെടികൾ വളർത്താൻ ഇഷ്ടപ്പെടുന്നവരാണ് പലരും. മുറികൾക്ക് പച്ചപ്പ് നൽകാനും വീടിന്റെ ഭംഗി കൂട്ടാനും ഇൻഡോർ പ്ലാന്റുകൾ സഹായിക്കും. എന്നാൽ ചെടികൾക്ക് വെള്ളവും വളവും വെളിച്ചവും നൽകിയാൽ മാത്രം മതിയാകില്ല. അവയുടെ പ്രത്യേക ആവശ്യങ്ങൾ മനസ്സിലാക്കാതെയുള്ള പരിചരണം ചിലപ്പോൾ ചെടികൾക്ക് ഗുണത്തേക്കാൾ ദോഷം ചെയ്യാം..ചെടികൾ പെട്ടെന്ന് വാടുകയോ ഇലകൾ മഞ്ഞനിറമാകുകയോ വളർച്ച നിലയ്ക്കുകയോ ചെയ്യുന്നുണ്ടെങ്കിൽ, ദിവസവും ചെയ്യുന്ന പരിചരണ രീതികളിൽ തന്നെ പ്രശ്നമുണ്ടാകാം. അറിയാതെ ചെയ്യുന്ന ചില കാര്യങ്ങൾ ശ്രദ്ധിക്കാം..ചെടിയുടെ വലുപ്പത്തിനനുസരിച്ചുള്ള ചട്ടി തിരഞ്ഞെടുക്കേണ്ടത് പ്രധാനമാണ്. വളരെ ചെറിയ ചട്ടിയിൽ ചെടി ഏറെക്കാലം വളർത്തുന്നത് വേരുകൾക്ക് ആവശ്യമായ സ്ഥലം ലഭിക്കാതെ വരാൻ കാരണമാകും. മണ്ണിലെ പോഷകങ്ങളും വെള്ളവും വേരുകൾക്ക് വേണ്ടത്ര ലഭിക്കാതെയും വളർച്ച മന്ദഗതിയിലാകുകയും ചെയ്യാം..ചെടി വളരുന്നതിനനുസരിച്ച് കുറച്ച് വലുപ്പം കൂടിയ ചട്ടിയിലേക്ക് മാറ്റുന്നത് നല്ലതാണ്. സാധാരണയായി ഒന്നോ രണ്ടോ വർഷം കൂടുമ്പോൾ റീപോട്ടിങ് ആവശ്യമുണ്ടോ എന്ന് പരിശോധിക്കാം. എന്നാൽ ഓരോ ചെടിയുടെയും വളർച്ചയും ആവശ്യവും വ്യത്യസ്തമാണെന്ന് ഓർക്കണം..കാഴ്ചയ്ക്ക് മനോഹരമായ പ്ലാന്ററുകൾ വാങ്ങുമ്പോൾ പലരും ഡ്രെയിനേജ് ഹോളുകളുണ്ടോ എന്ന് ശ്രദ്ധിക്കാറില്ല. എന്നാൽ അധിക വെള്ളം പുറത്തേക്ക് പോകാൻ കഴിയാത്ത ചട്ടിയിൽ ചെടി വളർത്തുന്നത് വേരുകൾക്ക് പ്രശ്നമാകാം. മണ്ണിൽ വെള്ളം കെട്ടിക്കിടന്നാൽ വേരുകൾക്ക് ആവശ്യമായ വായു ലഭിക്കാതെ വരുകയും വേരുകൾ ചീഞ്ഞുപോകാനുള്ള സാധ്യത കൂടുകയും ചെയ്യും..ചെടി നന്നായി വളരണമെന്ന ആഗ്രഹത്തിൽ അമിതമായി വളം നൽകുന്നതും തിരിച്ചടിയാകാം. അധിക വളം നൽകിയാൽ ഇലകളുടെ അറ്റം തവിട്ടുനിറമാകുക, വളർച്ച മുരടിക്കുക, ഇലകൾ മഞ്ഞനിറമാകുക തുടങ്ങിയ പ്രശ്നങ്ങൾ ഉണ്ടാകാം. സീസണും ചെടിയുടെ ഇനവും അനുസരിച്ച് വളപ്രയോഗം ക്രമീകരിക്കുന്നതാണ് നല്ലത്..ചെടികൾക്ക് വെള്ളം വേണമെന്നത് ശരിയാണ്. പക്ഷേ എല്ലാ ചെടികൾക്കും ദിവസവും ഒരേ അളവിൽ വെള്ളം ആവശ്യമില്ല. പ്രത്യേകിച്ച് കാക്ടസ്, സക്കുലന്റ് തുടങ്ങിയവയ്ക്ക് മണ്ണ് ഇടയ്ക്കിടെ ഉണങ്ങുന്നത് ആവശ്യമാണ്. ചില ഇനങ്ങൾക്ക് സ്ഥിരമായ ഈർപ്പം ആവശ്യമാകാം. മണ്ണ് നനവുള്ളപ്പോൾ വീണ്ടും വെള്ളം ഒഴിക്കുന്ന ശീലം ഒഴിവാക്കുക..ജനലിനരികിൽ വച്ചാൽ എല്ലാ ചെടികളും നന്നായി വളരുമെന്ന് കരുതേണ്ട. ചില ചെടികൾക്ക് നേരിട്ടുള്ള സൂര്യപ്രകാശം ആവശ്യമാണെങ്കിൽ മറ്റുചിലയ്ക്ക് പരോക്ഷമായ വെളിച്ചമാണ് അനുയോജ്യം. നേരിട്ടുള്ള വെയിൽ ചില ചെടികളുടെ ഇലകൾ കരിയാനും നിറം മാറാനും കാരണമാകാം..ഇലകൾ മഞ്ഞനിറമാകുന്നുണ്ടോ, വാടുന്നുണ്ടോ, അരികുകൾ ചുരുണ്ടുപോകുന്നുണ്ടോ, വളർച്ച നിലച്ചോ തുടങ്ങിയ കാര്യങ്ങൾ ശ്രദ്ധിക്കണം. ഇത്തരം മാറ്റങ്ങൾ നേരത്തെ തിരിച്ചറിഞ്ഞാൽ പരിചരണരീതിയിൽ ആവശ്യമായ മാറ്റങ്ങൾ വരുത്താനാകും..Subscribe to our Newsletter to stay connected with the world around youFollow Samakalika Malayalam channel on WhatsApp Download the Samakalika Malayalam App to follow the latest news updates
