പുഞ്ചിരിക്കുമ്പോൾ പല്ലിലെ കറ ശ്രദ്ധയിൽപ്പെടുന്നത് പലർക്കും ആത്മവിശ്വാസത്തെ ബാധിക്കാറുണ്ട്. പ്രായം കൂടുന്നതിനനുസരിച്ച് പല്ലിന് സ്വാഭാവികമായി നിറവ്യത്യാസം ഉണ്ടാകാം. എന്നാൽ പ്ലേക്ക് അടിഞ്ഞുകൂടുന്നതും ചില ഭക്ഷണപാനീയങ്ങളും പുകവലിയും പല്ലിന്റെ നിറത്തെ ബാധിക്കാം..പല്ലിന്റെ നിറം നിലനിർത്തുന്നതിൽ ഏറ്റവും പ്രധാനപ്പെട്ടത് സ്ഥിരമായ ബ്രഷിങ്ങാണ്. പ്ലേക്കും വായിലെ ബാക്ടീരിയയും നീക്കം ചെയ്യാൻ ഇത് സഹായിക്കും. അമേരിക്കൻ ഡെന്റൽ അസോസിയേഷൻ രണ്ട് മിനിറ്റ് വീതം ദിവസത്തിൽ രണ്ടുതവണ മൃദുവായ ബ്രിസിലുകളുള്ള ടൂത്ത് ബ്രഷ് ഉപയോഗിച്ച് പല്ലുതേക്കാൻ നിർദേശിക്കുന്നു..ബേക്കിങ് സോഡയ്ക്ക് നേരിയ രീതിയിൽ ഉരസുന്ന സ്വഭാവമുള്ളതിനാൽ പല്ലിന്റെ ഉപരിതലത്തിലെ ചില കറകൾ നീക്കം ചെയ്യാൻ സഹായിച്ചേക്കാം. ബേക്കിങ് സോഡ അടങ്ങിയ ചില ടൂത്ത്പേസ്റ്റുകൾ പ്ലേക്ക് കുറയ്ക്കുന്നതായും പഠനങ്ങൾ സൂചിപ്പിക്കുന്നു..എന്നാൽ കൂടുതൽ അളവിൽ അല്ലെങ്കിൽ അമിതമായി ഉപയോഗിക്കുന്നത് നല്ലതല്ല. ബേക്കിങ് സോഡ അടങ്ങിയ അംഗീകൃത ടൂത്ത്പേസ്റ്റ് ഉപയോഗിക്കുന്നതാണ് കൂടുതൽ പ്രായോഗികമായ മാർഗം..വെളിച്ചെണ്ണ ഉപയോഗിച്ചുള്ള ഓയിൽ പുള്ളിങ് രീതികൾ ഇന്ത്യയിൽ പാരമ്പര്യമായി ഉപയോഗിച്ചുവരുന്ന രീതിയാണ്. വായിലെ ബാക്ടീരിയ, പ്ലേക്ക്, മോണവീക്കം എന്നിവ കുറയ്ക്കാൻ സഹായിച്ചേക്കാം..വാണിജ്യാടിസ്ഥാനത്തിലുള്ള പല്ല് വെളുപ്പിക്കാനുപയോഗിക്കുന്ന പല ഉൽപ്പന്നങ്ങളിലും ഹൈഡ്രജൻ പെറോക്സൈഡ് ഉപയോഗിക്കുന്നുണ്ട്. പല്ലിന്റെ നിറം വെളുപ്പിക്കാൻ സഹായിക്കാമെങ്കിലും കൂടുതൽ സാന്ദ്രതയിലോ അമിതമായോ ഉപയോഗിച്ചാൽ മോണയിൽ അസ്വസ്ഥതയും പല്ലിന് സെൻസിറ്റിവിറ്റിയും ഉണ്ടാകാം..ചായ, കാപ്പി, റെഡ് വൈൻ, സോഡ, തക്കാളി അധിഷ്ഠിത സോസുകൾ, ഇരുണ്ട നിറമുള്ള ബെറികൾ തുടങ്ങിയ ചില ഭക്ഷണപാനീയങ്ങൾ പല്ലിൽ കറ ഉണ്ടാക്കാൻ സാധ്യതയുള്ളവയാണ്. ഇവ പൂർണമായി ഒഴിവാക്കണമെന്നില്ല; പല്ലുമായി ദീർഘനേരം സമ്പർക്കം പുലർത്തുന്നത് കുറയ്ക്കുകയാണ് പ്രധാനം..അസിഡിക് ഭക്ഷണപാനീയങ്ങൾ കഴിച്ച ഉടൻ പല്ലുതേക്കുന്നത് ഇനാമലിനെ ബാധിക്കാം. അതിനാൽ ഭക്ഷണത്തിന് ശേഷം ഏകദേശം 30 മിനിറ്റ് മുതൽ ഒരു മണിക്കൂർ വരെ കാത്തിരുന്ന ശേഷം ബ്രഷ് ചെയ്യുന്നതാണ് ഉചിതം..അമിതമായ പഞ്ചസാര ഉപയോഗം പ്ലേക്കിനും മോണവീക്കത്തിനും കാരണമാകുന്ന ബാക്ടീരിയകളുടെ വളർച്ചയെ പ്രോത്സാഹിപ്പിക്കും. അതിനാൽ പല്ലിന്റെ ആരോഗ്യത്തിനായി ഭക്ഷണത്തിലെ പഞ്ചസാരയുടെ അളവ് നിയന്ത്രിക്കുന്നതും പ്രധാനമാണ്..ബ്രഷ് ചെയ്യുമ്പോൾ എത്തിപ്പെടാൻ ബുദ്ധിമുട്ടുള്ള ഇടങ്ങളിൽ അടിഞ്ഞുകൂടുന്ന ഭക്ഷണാവശിഷ്ടങ്ങളും ബാക്ടീരിയയും നീക്കം ചെയ്യാൻ ഫ്ലോസിങ് സഹായിക്കും..പല്ലിന്റെ പുറംപാളിയായ ഇനാമൽ ദുർബലമാകുമ്പോൾ അതിനടിയിലുള്ള സ്വാഭാവികമായി മഞ്ഞ നിറമുള്ള ഡെന്റിൻ കൂടുതൽ ദൃശ്യമാകാം. പാൽ, ചീസ്, ബ്രൊക്കോളി തുടങ്ങിയ കാൽസ്യം അടങ്ങിയ ഭക്ഷണങ്ങൾ ഇനാമൽ സംരക്ഷിക്കാൻ സഹായിച്ചേക്കാം.
