ജലദോഷമോ ചെറിയ ദഹനപ്രശ്നങ്ങളോ ശരീരവേദനയോ ഉണ്ടാകുമ്പോൾ ആദ്യം ഓർമ വരുന്നത് വീട്ടിലെ ചില പരമ്പരാഗത പൊടിക്കൈകളായിരിക്കും. മഞ്ഞൾ, ഇഞ്ചി, പുതിന തുടങ്ങിയവ വർഷങ്ങളായി പല വീടുകളിലും ഉപയോഗിച്ചു വരുന്നു. ഇവയിൽ ചിലതിന് ആരോഗ്യപരമായ ഗുണങ്ങൾ ഉണ്ടാകാമെന്ന് ശാസ്ത്രീയ പഠനങ്ങളും സൂചിപ്പിക്കുന്നുണ്ട്..ഇന്ത്യൻ അടുക്കളയിലെ സ്ഥിരം സാന്നിധ്യമായ മഞ്ഞളിലെ കുർക്കുമിൻ ആണ് ഇതുമായി ബന്ധപ്പെട്ട് കൂടുതലായി പഠിക്കപ്പെട്ട ഘടകം. വീക്കവുമായി ബന്ധപ്പെട്ട ചില വേദനകൾ കുറയ്ക്കുന്നതിൽ കുർക്കുമിന് പങ്കുണ്ടാകാമെന്ന് പഠനങ്ങൾ സൂചിപ്പിക്കുന്നു. പ്രത്യേകിച്ച് സന്ധിവേദനയുമായി ബന്ധപ്പെട്ട ഗവേഷണങ്ങളിൽ ഇതിന്റെ സാധ്യത പരിശോധിച്ചിട്ടുണ്ട്..ജലദോഷം, തൊണ്ടവേദന, ഓക്കാനം തുടങ്ങിയ സാഹചര്യങ്ങളിൽ ഇഞ്ചി ഉപയോഗിക്കുന്നത് പലർക്കും പരിചിതമാണ്. ഇഞ്ചിക്ക് ആന്റി-ഇൻഫ്ലമേറ്ററി ഗുണങ്ങളുണ്ടാകാമെന്നും ചില പഠനങ്ങൾ സൂചിപ്പിക്കുന്നു. ഇഞ്ചി ചായയാണ് ഇതിന്റെ ലളിതമായ ഉപയോഗങ്ങളിലൊന്ന്..മുളകിലെ ക്യാപ്സൈസിൻ ചർമ്മത്തിൽ ചൂട് അനുഭവപ്പെടുകയും പിന്നീട് മരവിപ്പ് ഉണ്ടാവുകയും ചെയ്യുന്ന രീതിയിൽ പ്രവർത്തിക്കുന്നു. അതുകൊണ്ടുതന്നെ വേദന കുറയ്ക്കാനുള്ള ചില ടോപ്പിക്കൽ ചികിത്സകളിലും ക്യാപ്സൈസിൻ ഉപയോഗിക്കുന്നുണ്ട്. എന്നാൽ മുളക് അടങ്ങിയ മിശ്രിതം ചർമ്മത്തിൽ നേരിട്ട് പരീക്ഷിക്കുന്നതിന് മുമ്പ് ജാഗ്രത വേണം..യൂക്കാലിപ്റ്റസ് ഓയിലിലെ 1,8-cineole എന്ന ഘടകത്തിന് വേദന കുറയ്ക്കുന്നതുമായി ബന്ധപ്പെട്ട സാധ്യതകൾ പഠിക്കപ്പെട്ടിട്ടുണ്ട്. എന്നാൽ യൂക്കാലിപ്റ്റസ് ഓയിൽ ചിലരിൽ ശ്വാസകോശ സംബന്ധമായ പ്രശ്നങ്ങൾ ഉണ്ടാക്കാം; കുഞ്ഞുങ്ങളുടെയും വളർത്തു മൃഗങ്ങളുടെയും സമീപത്ത് ഉപയോഗിക്കുമ്പോൾ ജാഗ്രത വേണം..ലാവെൻഡറിന്റെ സുഗന്ധം ഉപയോഗിച്ചുള്ള അരോമതെറാപ്പി ചിലരിൽ സമ്മർദം കുറയ്ക്കാനും വിശ്രമിക്കാനും സഹായിക്കാമെന്ന് പഠനങ്ങൾ പരിശോധിച്ചിട്ടുണ്ട്. മൈഗ്രെയ്ൻ, ഉത്കണ്ഠ, ഉറക്കവുമായി ബന്ധപ്പെട്ട ചില പ്രശ്നങ്ങൾ എന്നിവയിലും ലാവെൻഡറിന്റെ സാധ്യതകൾ പഠിക്കപ്പെട്ടിട്ടുണ്ട്..ഇറിറ്റബിൾ ബവൽ സിൻഡ്രോം (IBS) ഉൾപ്പെടെയുള്ള ചില ദഹനപ്രശ്നങ്ങളുമായി ബന്ധപ്പെട്ട് പുതിനയുടെ ആരോഗ്യ ഗുണങ്ങൾ പഠിച്ചിട്ടുണ്ട്. വയറുവേദന, വയറിലെ മുറിവേദന, വയറിളക്കം തുടങ്ങിയ ചില ലക്ഷണങ്ങൾ കുറയ്ക്കുന്നതിൽ പുതിന സഹായിക്കുമെന്ന് പഠനങ്ങൾ സൂചിപ്പിക്കുന്നു..ഉലുവ ഭക്ഷണത്തിന്റെ ഭാഗമായും പരമ്പരാഗതമായി വിവിധ ആവശ്യങ്ങൾക്കുമായി ഉപയോഗിക്കുന്നു. മുലയൂട്ടുന്നവരിലെ പാലുത്പാദനം, രക്തത്തിലെ പഞ്ചസാരയുടെ നിയന്ത്രണം തുടങ്ങിയ മേഖലകളിൽ ഉലുവയെക്കുറിച്ച് പഠനങ്ങൾ നടന്നിട്ടുണ്ട്. എന്നാൽ മലബന്ധമുള്ളവർക്ക് ഉലുവ അനുയോജ്യമല്ലായിരിക്കാമെന്നും റിപ്പോർട്ട് ചൂണ്ടിക്കാട്ടുന്നു..വീട്ടുവൈദ്യമോ പ്രകൃതിദത്ത പരിഹാരമോ ആണെന്നത് അവ എല്ലായ്പ്പോഴും സുരക്ഷിതമാണെന്ന് അർഥമാക്കുന്നില്ല. ചില മരുന്നുകളുമായി ഇവയ്ക്ക് ഇടപെടലുകൾ ഉണ്ടാകാം. നിലവിൽ മരുന്ന് കഴിക്കുന്നവരും ഏതെങ്കിലും ആരോഗ്യപ്രശ്നമുള്ളവരും ഇത്തരം കാര്യങ്ങൾ പതിവായി ഉപയോഗിക്കുന്നതിന് മുമ്പ് ഡോക്ടറോട് സംസാരിക്കുന്നത് നല്ലതാണ്..Subscribe to our Newsletter to stay connected with the world around youFollow Samakalika Malayalam channel on WhatsApp Download the Samakalika Malayalam App to follow the latest news updates
