ഭക്ഷണം കേടാകാതിരിക്കാനും കൂടുതൽ കാലം ഫ്രെഷായി സൂക്ഷിക്കാനും ഫ്രിഡ്ജിൽ വയ്ക്കുക എന്നതാണ് നമ്മുടെയെല്ലാം പതിവ്. എന്നാൽ ഫ്രിഡ്ജിൽ വച്ചാൽ എല്ലാ ഭക്ഷണവും കൂടുതൽ ഫ്രെഷായി തുടരുമെന്ന ധാരണ ശരിയല്ല. ചില ഭക്ഷണങ്ങൾ ഫ്രിഡ്ജിലെ തണുപ്പും ഈർപ്പവും കാരണം രുചിയും ടെക്സ്ചറും നഷ്ടപ്പെടാനും കേടുവരാനും സാധ്യതയുണ്ട്..ബ്രെഡ് കൂടുതൽ ദിവസം സൂക്ഷിക്കാനായി പലരും ഫ്രിഡ്ജിൽ വയ്ക്കാറുണ്ട്. എന്നാൽ ഇത് ബ്രെഡ് വേഗത്തിൽ ഉണങ്ങാനും കട്ടിയാകാനും കാരണമാകാം. അതോടെ ബ്രെഡിന്റെ സ്വാഭാവിക രുചിയും മൃദുത്വവും നഷ്ടപ്പെടും. കുറച്ച് ദിവസത്തിനുള്ളിൽ ഉപയോഗിക്കാനുള്ള ബ്രെഡ് സാധാരണയായി വരണ്ടതും വൃത്തിയുള്ളതുമായ സ്ഥലത്ത് അടച്ചുവയ്ക്കാം..തക്കാളിയുടെ സ്വാഭാവിക രുചി നിലനിർത്തണമെങ്കിൽ ഫ്രിഡ്ജിൽ വയ്ക്കാതിരിക്കുന്നതാണ് നല്ലത്. തണുത്ത അന്തരീക്ഷം തക്കാളിയുടെ പഴുക്കൽ പ്രക്രിയയെ തടസ്സപ്പെടുത്തുകയും രുചിയിൽ മാറ്റം വരുത്തുകയും ചെയ്യും. തക്കാളി മുറിയിലെ താപനിലയിൽ സൂക്ഷിക്കാം..സവാളയ്ക്ക് ഈർപ്പം ഒട്ടും നല്ലതല്ല. ഫ്രിഡ്ജിനുള്ളിലെ ഈർപ്പം സവാള മൃദുവാകാനും പൂപ്പൽ പിടിക്കാനും കാരണമാകാം. പുറത്തുനിന്ന് നോക്കുമ്പോൾ കേടായെന്ന് പെട്ടെന്ന് മനസ്സിലാകാത്തതും പ്രശ്നമാകാം. സവാള വരണ്ടതും വായുസഞ്ചാരമുള്ളതുമായ സ്ഥലത്ത് സൂക്ഷിക്കുന്നതാണ് നല്ലത്..ഫ്രിഡ്ജിൽ വെച്ചാൽ വെളുത്തുള്ളി റബ്ബർ പോലെയാകാനും പൂപ്പൽ പിടിക്കാനും പിന്നീട് മുളയ്ക്കാനും സാധ്യതയുണ്ട്. ഇതോടെ വെളുത്തുള്ളിയുടെ സ്വാഭാവിക രുചിയിലും മാറ്റമുണ്ടാകാം.വരണ്ടതും വായുസഞ്ചാരമുള്ളതുമായ സ്ഥലമാണ് വെളുത്തുള്ളിക്ക് അനുയോജ്യം..മല്ലിയില, പുതിന തുടങ്ങിയ ഫ്രഷ് ഹെർബ്സ് ഫ്രിഡ്ജിൽ സൂക്ഷിക്കുന്നത് പലരുടെയും പതിവാണ്. എന്നാൽ ഇവ ചുറ്റുമുള്ള ഗന്ധങ്ങൾ എളുപ്പത്തിൽ ആഗിരണം ചെയ്യുന്നതിനാൽ ഫ്രിഡ്ജിൽ വച്ചാൽ അവയുടെ സ്വാഭാവിക രുചി നഷ്ടപ്പെടാം. വേഗത്തിൽ ഉണങ്ങാനും സാധ്യതയുണ്ട്..പഴം ഫ്രിഡ്ജിൽ വച്ചാൽ പഴുക്കുന്ന പ്രക്രിയ മന്ദഗതിയിലാകും. അടുത്ത ഏതാനും ദിവസങ്ങൾക്കുള്ളിൽ കഴിക്കാനാണ് ഉദ്ദേശിക്കുന്നതെങ്കിൽ മുറിയിലെ താപനിലയിൽ സൂക്ഷിക്കാം..പലപ്പോഴും കടയിൽ നിന്ന് വാങ്ങുന്ന അവക്കാഡോ പൂർണമായി പഴുത്തിട്ടുണ്ടാകില്ല. അത്തരം അവക്കാഡോ ഫ്രിഡ്ജിൽ വച്ചാൽ പഴുക്കാൻ ഇനിയും കൂടുതൽ സമയം എടുക്കും.പഴുക്കാത്ത അവക്കാഡോ മുറിയിലെ താപനിലയിൽ വച്ച് പഴുപ്പിച്ചശേഷം ഉപയോഗിക്കുന്നതാണ് പ്രായോഗികം..തേൻ സ്വാഭാവികമായി ഏറെക്കാലം സൂക്ഷിക്കാൻ കഴിയുന്ന ഭക്ഷണമാണ്. അതിനാൽ അടച്ചുവെച്ച തേൻ ഫ്രിഡ്ജിൽ സൂക്ഷിക്കേണ്ട ആവശ്യമില്ല. തണുത്ത അന്തരീക്ഷത്തിൽ തേൻ ക്രിസ്റ്റലൈസ് ചെയ്ത് കട്ടിയാകാം. അതോടെ സ്പൂൺ ഉപയോഗിച്ച് എടുക്കുന്നതുപോലും ബുദ്ധിമുട്ടാകും..ബദാം, കശുവണ്ടി, വാൾനട്ട് തുടങ്ങിയ നട്സ് ഫ്രിഡ്ജിൽ സൂക്ഷിക്കുന്നവരുണ്ട്. തണുത്ത താപനില അവയിലെ സ്വാഭാവിക എണ്ണകൾ പെട്ടെന്ന് കേടാകുന്നത് തടയാൻ സഹായിക്കുമെങ്കിലും, രുചിയിൽ മാറ്റമുണ്ടാകാം. തൊലി നീക്കം ചെയ്ത നട്സ് ഫ്രിഡ്ജിലെ മറ്റ് ഭക്ഷണങ്ങളുടെ ഗന്ധവും ആഗിരണം ചെയ്യാൻ സാധ്യതയുണ്ട്..ബ്രെഡിൽ പുരട്ടാൻ ഉപയോഗിക്കുന്ന ചോക്ലേറ്റ് സ്പ്രെഡ് ഫ്രിഡ്ജിൽ വച്ചാൽ കട്ടിയാകുകയും പുരട്ടാൻ ബുദ്ധിമുട്ടാകുകയും ചെയ്യും. മുറിയിലെ താപനിലയിൽ സൂക്ഷിച്ചാൽ എളുപ്പത്തിൽ സ്പ്രെഡ് ചെയ്യാനും കൂടുതൽ തീവ്രമായ രുചി ലഭിക്കാനും സാധിക്കും..Subscribe to our Newsletter to stay connected with the world around youFollow Samakalika Malayalam channel on WhatsApp Download the Samakalika Malayalam App to follow the latest news updates
